Ntau pua txhiab leej neeg mus koom ua hmoov tsuj xeeb Yes Xus yug los nyob Fis Lis Pees teb

Thousands in badly hit areas attended Christmas novena in Philippines (UCANews photo)

Sunday, January 09, 2022

Tab txawm muaj kev kub ntxhov thiab kev piam sij los ntawm lub khaub lig cua LAIS, tsis kav cov neeg ntseeg Kav Tos Liv nyob nruab nrab hauv Fis Lis Pees teb kuj tseem sib koom ua thaj txi Ntuj thiab ua hmoov tsuj xeeb Yes Xus yug los li qub.

Coob leej mus hauv tsev teev Ntuj, tab txawm lub tsev teev Ntuj piam sij ntau kawg tsis kav cov neeg ntseeg kuj sib sau ua cov kab ke Simbangabi txij hnub tim 16 los txog hnub tsuj xeeb Yes Xus yug los.

Ntau tus Txiv Plig mus koom ua thaj txi Ntuj thaum sawv ntxov nyob hauv lub tsev teev Ntuj Cathedral of San Nicolas de Tolentino, nyob hauv lub xeev Surigao del Norte. Tab txawm tsis muaj hluav taws xob, tsis kav cov Txiv Plig kuj zoo siab luag ntxhi thiab muaj lub siab kub lug. Txiv Plig Llogon hais tias cov neeg ntseeg coob leej tsis muaj vaj tse nyob, vim lub khaub lig cua los raug hnub tim 22 lub 12 hlis dhau los, tsis kav lawv kuj muab siab rau koom kev ua hmoov tsuj xeeb. Lub khaub lig cua los raug Fis Lis Pees teb, ua rau neeg tuag 375 leeg thiab ploj lawm 56 leej.

Tseem muaj tsoom pej xeem ntau txhiab leej nyob hauv cov pov txwv xws li ; Siargao, Surigao thiab Dinagat tsis muaj vaj tse nyob, tsis muaj txhiam xws noj thiab dej haus. Lub khaub lig cua tau rhuav ntau lub tsev teev Ntuj thiab ua hluav taws xob tu tag, tsis kav cov neeg ntseeg kuj siv tswm ciab los taws pom kev ua hmoov tsuj xeeb Yes Xus yug los.