Ntes tau tus neeg tua Txiv Plig Tentorio lawm

Tuesday, December 21, 2021

Cov tub ceev xwm Fis Lis Pees tau ntes tus neeg uas tua Txiv Plig Tentorio lawm. Txiv Plig Tentorio yug nyob Is Tas Lias zwm rau lub Cheeb Koom Txoos txawv teb chaws (PIME). Nws raug tua tuag hnub tim 17 lub 10 hli xyoo 2011, lub caij nws tshaj Ntuj Lus nyob pem toj siab Arakan, hauv lub xeev Mis Ntas Naus.

Ricardo Boryo Dorado los yog neeg paub nws nyob hauv lub npe Nene Dorado, nws yog ib tug qub hau zos nyob hauv lub zos Dallag, nws muaj 66 xyoo. Nws kuj yog ib tug nyob hauv 7 leej uas tub ceev xwm nrhiav ntes hais txog kev tua neeg.

Tus kws lij choj Arvin Sadiri Balagot uas yog tus txiav txim nyob hauv lub nroog Kidapawan tau tawm tsab ntawv ntes Nene Dorado hnub tim 30 lub 4 hlis xyoo 2019.

Muaj coob leej tim khawv tau tawm los hais tom qab Txiv Plig raug tua tuag, lawv hais tias Dorado thiab cov tub rog saib xyuas kev ruaj ntseg neeg Npas Kas Nis yog cov txw kom Dorado nyiag tus Txiv Plig. Dorado yog ib tug neeg nyob hauv pab neeg Las Kas, yog cov neeg ntseeg thoj nam khiav mus nyob Mis Ntas Naus 10 tawm xyoo tag los. Nws muaj feem cuam txog kev sib tua ntawm haiv neeg Mas Nos Npos hais txog sib txeeb av.

Txiv Plig Tentorio txoj kev tshaj Ntuj Lus 30 xyoo, nws yog ua cov hauj lwm pab txuag cov neeg toj siab, ces nws thiaj raug tua tuag.

Xyoo 2019 cov tub ceev xwm tau hais tias : lawv tau tshuaj xwm ntau yam, tab sis nyob hauv lawv 7 leej ntawd tsis tau raug ntes.

Ntau lub lis piam dhau los, Andolana tus kws txoj cai nyob hauv lub nroog Kidapawan tau sib hais txog Txiv Plig Tentorio txoj kev tuag, nws tau tham nrog Rappler uas yog lub Website xov xwm Online, yog Maria Ressa uas tau txais lub paj tshab Nos Npes kev thaj yeeb xyoo 2021 ua tus tsim.

Cov neeg uas tua neeg yeej niaj hnub pom nyob hauv Arakan thiab Das Vaus, tab sis yog vim lawv muaj cov neeg nplua nuj thiab tej tug nom loj muaj hwj chim pov hwm lawv. Tam sim no tab tom muaj kev sib tw yuav xaiv tsa pab nom tshiab xyoo 2022 nyob Fis Lis Pees teb, tab sis Nene Dorado raug ntes lawm. Cov tub ceev xwm mus ntes yawg Dorado nyob hauv nws tsev. Tub ceev xwm hais rau Dorado tias tsis txhob khiav nkaum, vim muaj ntawv tso cai ntes nws los tau 2 lub xyoo lawm. Tseem tshuav 6 leej uas ntes tsis tau, vim lawv nyob hauv kev pov hwm ntawm cov neeg nplua nuj thiab qee tug nom.