Is Ntias tus Txoov Tim Tswv thov kom lub xeev Manipur ua kom muaj kev ncaj ncees

Hnub tim 24 lub 7 hli tag los, muaj tshaj 3,200 tus pej xeem tau sau npe thov kom Is Ntias tus Txoov Tim Tswv leej maj mus raus tes nrog, kom tau cheem kev kub ntxhov ntawm cov haiv neeg nyob hauv lub xeev Manipur.

Kev sau cim txog tej yam sau no yog los ntawm National Alliance of People’s Movements (NAPM) uas yog lub Koom Haum ntawm cov neeg txawj ntse, cov tub paj nruag, cov tub tseem hwv uas so laus thiab tsoom pej xeem uas muaj feem cuam. Yog tus sawv cev ntawm pab pawg tawm tsam thiab ntau pua lub Koom Haum nyob thoob lub teb chaws.  

‘Peb thov kom koj tuaj saib lub xeev thiab pab txuag kev ncaj ncees rau cov neeg uas raug quab yuam txhua leej, tshwj xeeb yog tus poj niam Kuki Zo uas nws raug quab yuam mos deev, quab yuam lub cev thiab siab ntsws.” Yog cov neeg tawm tsam sau ntawv mus rau thawj tug Txoov Tim Tswv ntawm cov haiv neeg thiab cov pej xeem nyob hauv lub teb chaws.

Lawv sau npe xav kom tus Txoov Tim Tswv ntiab tus thawj pwm tsav thiab cov nom nyob hauv lub xeev Manipur tawm mus sai sai, vim lawv tsis muaj kev saib xyuas kev ncaj ncees thiab txoj cai, lawv piam sij loj kawg. Lawv tsis tau saib kev ruaj ntseg thiab txoj cai hauv lub xeev, ua rau kev kub ntxhov ntawm cov haiv neeg heev zuj zus txij hnub tim 3 lub 5 hlis los lawm.

Tsab ntawv no sau tawm tom qab muaj ib qho Video tawm nyob hauv Social Media, hais txog tus poj niam Kuki Zo raug hle liab qab rau sawv daws saib hnub tim 19 lub 7 hlis tag los. Cov xwm tshwm sim yog hnub tim 4 lub 5 hlis.

Kev tawm tsam no muaj Txiv Plig Cedric Prakash uas nyob hauv pab Yes Xus Is, thov kom tus Txoov Tim Tswv soj ntsuam thiab lees kev txhaum ntawm txhua pab nom, thiab ua kom rov muaj kev thaj yeeb, kev ncaj ncees nyob hauv lub xeev.

Tsab ntawv no thuam cov tseem hwv txoj kev ua hauj lwm, tsis yog tias piam sij xwb tseem ua kom lub xeev kub ntxhov los tau 3 lub hlis. Thiab ua kev chawj chim rau cov haiv neeg heev zuj zus. Thov kom tus Txoov Tim Tswv pab txuag txoj cai thiab kev thaj yeeb ntawm txhua haiv neeg tsawg uas feem coob yog cov poj niam. Pab soj ntsuam kom paub meej tias tsis muaj kev txawv txav nyob hauv tseem hwv txoj cai thiab ua kom muaj ncaj ncees rau cov poj niam uas tau teev npe tseg.

60 tawm hnub ntawm cov pej xeem raug lwg, khaj cai taug kev thiab tus poj niam Kuki raug quab yuam. Txog tav no cov neeg phem tseem nyob ywj pheej.