OB LUB TSEV TEEV NTUJ PLOS TES TAAS RAUG TSHAWB RAUG RHUAV

Wednesday, March 17, 2021

Tsis ntev los no, muaj 2 lub tsev teev Ntuj nyob Npees Las Des teb raug tshawb thiab raug rhuav pov tseg, ces ua kev txhawj xeeb loj kawg rau cov neeg ntseeg nyob Npees Las Des. Hnub tim 25 lub 2 hlis tag los, muaj cov tub tseem hwv saib xyuas hav zoov li ntawm 10 leej tau rhuav ib lub tsev teev Ntuj Satirampara Seventh-day Adventis nyob hauv lub zos Ali Kadam lub nroog Bandarban. Lub tsev teev Ntuj ntawd cov neeg ntseeg tab tom txhim tsa, vim yav thaud mas yog xov nruab tab sis nyem no cov neeg ntseeg muab hloov ua ntsa zeb.

Cov tub tseem hwv saib xyuas hav zoov hais tias : cov neeg ntseeg txhim lub tsev teev Ntuj ntawd, mas lawv tsis tau thov lus tso cai thiab lawv txhim nyob hauv thaj av uas tsis yog pej xeem li av. Tab sis nyob thaj tsam ntawd, muaj 4 lub tsev teev Ntuj, 3 lub tsev teev hawm Phus Thas, 4 lub khw loj thiab muaj tsev kawm ntawv uas yog tseem hwv li thiab yog neeg ntiag tug.

Tripura uas nws yog ib tug thawj coj ntawm cov neeg ntseeg hais tias : cov neeg ntseeg nyob 2 lub zos saum roob niaj lis piam tuaj hauv lawv zos thiab teev Ntuj ua ke los tau ntau caum xyoo lawm. Nyob hauv lawv lub zos muaj neeg nyob tshaj 100 leej thiab lawv yeej tab meeg thov Ntuj. Cov tub tseem hwv saib xyuas hav zoov kuj hais tias : lawv tsis tau rhuav lub tsev teev Ntuj, lawv tsuas yog tuaj soj ntsuam thiab saib xyuas tseem hwv cov av xwb. Thaj tsam Lalmonirhat uas nyob Npees Las Des qaum teb, mas cov Mawv Xis Lim nyob txum tim twb tau tawm tsam riv lub tsev teev Ntuj Is Mas Nus Es, uas yog ib lub tsev teev Ntuj Plos Tes Taas nyob hauv lub zos Mawv Xis Lim. Lub tsev teev Ntuj Is Mas Nus Es twb muaj txij xyoo 2002 los lawm. Kev kub ntxhov ntawm lub Koom Txoos ntseeg, mas pib los ntawm kev sib txw tiv kev ntseeg nyob hauv cov Islam nyob ib cheeb tsam ntawd. Cov thawj coj ntawm cov Mawv Xis Lim kuj koom tes nrog txoj kev ntxub ntxaug no thiab.