Tej yam yooj yim ntawm cov Kav Tos Liv lub caij kaw tus kheej nyob hauv tsev tiv thaiv COVID-19

Cov Leej Phauj ntawm lub Koom Haum Saint Charles Borromeo thiab cov Leej Phauj Yes Xus Is qhib tsev tos txais cov neeg tsis muaj chaw nyob thiab cov neeg nyob ib leeg twm zeej, kom lawv tau tuaj nyob kho mob. Tam sim no muaj cov neeg mob Coronavirus txhab ntxiv li ntawm 22,000 thiab muaj cov neeg tuag tshaj 1000 tawm leej lawm.

Cov neeg ntseeg Kav Tos Liv nyob Is Ntos Nes Xias teb tab tom npaj tej yam yooj yim siv los pab rau cov neeg txom nyem uas raug tus kab mob COVID-19. Nyob hauv lub nroog Xes Mas Las thiab Ntsas Kas Tas, yog 2 qhov chaw uas cov Leej Phauj ntawm lub Koom Haum Charles Borromeo ua cov qhib tsev tos txais cov neeg mob COVId-19 yam tsis raug them nyiaj li. Tas txhia yam yog tau txais kev txhawb nqa los ntawm lub Cheeb Koom Txoos Xes Mas Las. Leej Phauj Yustiana Wiwiek Iswanti hais tias peb txiav txim siab muab peb lub tsev Syantikara Retreat House thiab 145 chav tsev ua qhov chaw rau cov neeg mob COVID-19 nyob thiab tsis khaws nyiaj. Cov Leej Phauj lawv tos txais cov neeg muaj mob thiab lawv ua cov ntaus thawj saib xyuas cov neeg mob nyob hauv tsev kho mob. Txawm li cas kuj xij, nyob hauv lub nroog Xes Mas Las tsuas muaj cov chav tsev tos txais neeg mob 32 chav xwb, ces lawv yuav tsum xaiv tus neeg muaj mob hnyav thiab tus neeg txom nyem nyob hauv cov chav tsev ntawd.

Cov Leej Phauj ntawm lub Koom Haum Saint Charles Borromeo, lawv muaj ntau qhov chaw kho mob nyob hauv Is Ntos Nes Xias teb thiab lawv tseem saib xyuas cov tsev kawm ntawv ntau lub kawg.

Cov nyiaj txhawb nqa feem ntau yog tau los ntawm cov qub tub kawm ntawv lawv pab tuaj. Hos cov Leej Phauj Yes Xus Is lawv ua hauj lwm pab cov neeg mob nyob hauv lub xeev Ntsas Vas nrab, lawv kuj tau npaj kom muaj ntau yam yooj yim siv rau cov neeg mob COVID-19 thiab. Txiv Plig Yustinus Ardianto nyob hauv lub tuam ceeb hais tias : peb zoo siab tos txais txhua tus tuaj ntawm no, tab sis yuav tsum yog cov neeg tsis muaj vaj tse thiab pluag txom nyem xwb.