THANH HOA COV HAUJ LWM PAB HMOOB

Joseph NguyễnĐứcCường yog tus Tswv Qhia nyob Thanh Hoa. Lub Cheeb Koom Txoos Thanh Hoa yog nyob Nyab Laj qaum teb npuas Los Tsuas teb. Thanh Hoa xav ua ib co hauj lwm los pab cov haiv neeg tsawg nyob ntawd. Lub caij no yuav txog lub Tsiab Peb Caug, ces cov neeg ntseeg Kav Tos Liv thiab cov nplua nuj thiaj tau mus tsham xyuas cov Hmoob nyob hauv lub zos Locha thiab Pa Pua hauv lub nroog Muong Lat. Hauv Muong Lat muaj tsoom pej xeem nyob ze ntawm 42,000 leej. 42,000 leej ntawd muaj 6 haiv neeg tsawg nyob sib xyaws ua ke. Tab sis cov coob yog Hmoob thiab Thai. Cov Hmoob feem coob yog nyob chaw ntxhab thiab txom nyem dua. Hais txog kev mus ncig tsham tej zej zog zaum no yog zaum 3, suav txij li Tswv Qhia Joseph tau txais txoj hauj lwm no los.

Vim li no Tswv Qhia Joseph thiaj tau mus tsham tej zej zog tsis tseg kom tau nrog cov neeg ntseeg sib fim xwm yeem. Kev mus tsham cov neeg ntseeg zaum no lawv tau ua thaj txi Ntuj nyob ntawm tshav puam uas ib ncig muaj xyoob ntoo ntsuab xiab, vim cov neeg nyob toj siab yog cov neeg pluag txom nyem, lawv tsis muaj tsev teev Ntuj. Nyob rau lub caij muaj tus kab mob Covid-19 sib kis no, cov tub tshaj Ntuj Lus tau nrog cov neeg ntseeg sib fim thiab sib pab txhawb nqa lub neej nyob hauv kev ncaj ncees thiab muaj lub siab kub lug nyob hauv txoj kev ntseeg. Sawv daws yuav sib koom siab ua ib tug thiab sib nyiam sib hlub.

Qhov kawg Tswv Qhia Joseph thiab cov neeg nrog nws tau faib paj tshab ua lub xyoo tshiab uas yog hnub tim 12 lub 2 hlis xyoo no. Sawv daws hu nkauj thov Ntuj pub kev thaj yeeb rau cov neeg ntseeg kom niaj hnub sawv daws muaj lub zog tiv thaiv tus kab mob zim txwv no.