THAWJ LUB TSEV TEEV NTUJ HMOOB NYOB LOS TSUAS TEB

Nyob zoo kwv tij Hmoob sawv daws !

Ntawm no yog ib lub moo zoo uas xav tias yog peb tau hnov lawm, peb yuav muaj kev zoo siab heev. Tam sim no yog lub 1 hlis xyoo 2021, nyob hauv lub zos Tiaj Ntxhw Tuag (Zos Nam Yam), tab tom pib txhim tsa ib lub tsev teev Ntuj Kav Tos Liv tshiab, thiab yog thawj lub tsev teev Ntuj Kav Tos Liv nyob hauv ib lub zos Hmoob.

Txij xyoo 1975 los txog zim txwv no, tsis tau muaj dua ib lub tsev teev Ntuj Kav Tos Liv nyob hauv ib lub zos Hmoob twg li. Hauv lub zos Tiaj Ntxhw Tuag, yav tag los muaj Xib Hwb Xaiv Kiam Vwj ua tus saib cov neeg ntseeg uas yog lub Koom Txoos cov yaj. Xib Hwb Xaiv Kiam tus npau suav los yog txoj kev cia siab, mas yog xav pom ib lub tsev teev Ntuj nyob hauv lawv lub zos. Tab sis tsaib no, Xib Hwb Xaiv Kiam tau ncaim lub ntiaj teb no mus nrog Tswv Ntuj nyob lawm. Tam sim no tshuav Xib Hwb Tswb Tsab, Xib Hwb Huas Tsab thiab ob peb tug hluas ua cov coj cov neeg ntseeg nyob hauv lub zos xwb. Cov neeg ntseeg Kav Tos Liv nyob Tiaj Ntxhw Tuag muaj ze ntawm 40 tawm yim. Zos Tiaj Ntxhw Tuag yog zwm rau lub Cheeb Koom Txoos Vientiane, nyob hauv lub nroog Thub Lab Khoos, nyob tsis deb ntawm tuam ceeb Vientiane. Lub tsev Teev Ntuj no yuav rau lub npe hu ua “Tsev teev Ntuj Tim Khawv Paj Lug Thoj Xyooj”, vim lub tsev teev Ntuj no yog thawj lub thiab Xib Hwb Thoj Xyooj kuj yog thawj tug tub tshaj Ntuj Lus Hmoob uas tau tuag ua Yes Xus tim khawv.

Kev txhim tsa thawj lub tsev teev Ntuj zaum no, yog tau kev txhawb nqa los ntawm lub Cheeb Koom Txoos Vientiane thiab cov Hmoob ntseeg Kav Tos Liv nyob txawv teb chaws, xws li As Mes Lis Kas teb, Kas Nas Das teb thiab nyob Fab Kis teb.

Thov ua tsaug ntau ntau rau lub Cheeb Koom Txoos nyob Vientiane thiab cov neeg ntseeg, cov tsev teev Ntuj nyob txawv teb chaws uas nej tau sib pab txhawb nqa kom muaj thawj lub tsev teev Ntuj rau peb cov Hmoob nyob Los Tsuas teb. Thov Tswv Ntuj foom koob hmoov pub rau nej thiab lub Koom Txoos. Thov kom sawv daws muaj kev sib fim thiab sib pab txhawb nqa txoj kev tshaj Ntuj Lus ntxiv mus !