Thawj tus neeg Is Ntias yuav raug tsa ua Leej Ntshiab hnub tim 15 lub 5 hlis 2022

Vaj Qhia Fas Ntshis Kus yuav npaj tsa Dewasahayam Pillai thiab 6 leej ua Leej Ntshiab rau lub thaj txi Ntuj lwm xyoo, nyob hauv lub tsev teev Ntuj Leej Ntshiab Pob Zeb, nyob Los Mas. Yog lwm xyoo hnub tim 15 lub 5 hlis 2022.

Vas Tis Kas tshaj tawm nyob hauv lub rooj sab laj ntawv xov xwm hais txog tsa cov Leej Ntshiab hnub tim 9 lub 11 hlis no.

Lub Koom Txoos hais tias Dewashayam Pillai yog ib tug neeg muaj kev ntseeg zoo thiab tsis muab hlob, yog tus yeem tuag vim nws txoj kev ntseeg nyob hauv lub xeev Travancore ua ntej tiam 18.

Hnub tim 3 lub 5 hils xyoo no, Vaj Qhia Fas Ntshis Kus twb tau tso cai hais txog kev tsa Leej Ntshiab lawm, tab sis vim yog Vaj Qhia lub cev ntaj ntsug muaj mob thiab muaj tus kab mob COVID-19 sib kis, ces thiaj tsis tau txiav meej tias yuav ua thaj txi Ntuj tsa Leej Ntshiab rau hnub twg xwb.

Dewashayam Pillai yug hnub tim 23 lub 4 hlis xyoo 1712, nws lub npe hu ua Neelakanda Pillai, nyob hauv lub zos Nattalam, caj ces Nair. Nws loj hlob nyob hauv txoj kev ua tus vaj Mathanda Varma qhev, uas yog tus vaj muaj meej mom tshaj nyob hauv lub xeev Travancore, nyob Kerala qab teb thiab tej suam teb chaws nyob Tamil Nadu. Tom qab tsov rog Kulachal, nws raug De Lenoy uas yog ib tug neeg Nes Des ua khawv koob rau nws. De Lenoy yog raug tus vaj Marthanda Varma cov tub rog ntes.

Ntseeg tias De Lenoy yog tus txw kom Dewashayam Pillai tig los ntseeg. Nws tau txais lub Cim Ntxuav ua neeg Kav Tos Liv los ntawm ib tug Txiv Plig Yes Xus Is xyoo 1745. Nws siv lub npe Lazarus los yog Devasaim nyob hauv nws xeem lus, txhais tias ‘Tswv Ntuj yog kuv txoj kev vam khom’.

Ib tug kwv liv xwm nyob hauv lub tsev teev Ntuj piav tias : kev hloov siab ntawm Dewashayam Pillai raug cov hlob thuam heev kawg lub caij ntawd. Lawv hais lus mos lus muag ntxias nws ntau zaus kom nws tso txoj kev ntseeg pov tseg.

Dewashayam Pillai raug lub txim tias nws ntxeev siab thiab nyiag xov xwm, ces nws raug txo ntawm nws tus nom nyob hauv tus vaj lub tsev. Nws raug kaw nkuaj thiab raug quab yuam, raug hiam heev kawg.

Vim Dewashayam Pillai tsis kam lees nws lub txim, ces nws raug kaw thiab raug tsim txom 3 xyoos. Qhov kawg nws raug coj mus ib qho chaw deb thiab muab nws tua pov tseg, hnub tim 14 lub 1 hlis xyoo 1752.