TSEEM HWV LOS TSUAS TXOJ CAI TSIS POV HWM COV NEEG NTSEEG

Wednesday, February 03, 2021

Muaj 2 yim neeg yog cov haiv neeg tsawg tau tig los txais kev ntseeg, lawv raug cov neeg zej zog thuam thiab hiam tias 2 yim neeg ntawd coj txoj kev teev hawm uas cov tseem hwv tsis nyiam thiab muaj tsis coob nyob hauv lub teb chaws. Los Tsuas teb feem coob yog teev hawm Phus Thas thiab teev poj yawm txwv koob.

2 yim neeg uas hais txog no yog neeg Khab Mub, yog ib haiv neeg tsawg uas mauj coob kawg nyob hauv Los Tsuas teb. Tsoom pej xeem Los Tsuas feem coob kuj xav tias kev hloov siab mus txais kev ntseeg, yog ib yam txhaum tseem hwv txoj cai. Tab sis qhov tseeb tiag kev ntseeg tsis txhaum leej twg thiab cov neeg ntseeg tuaj yeem ua txhua yam zoo ywj lawv siab. Tsis kav ntau zaus cov hau zos thiab cov tub ceev xwm saib cov neeg ntseeg nyob hauv zej zog yog cov tsis zoo.

Los Tsuas teb yog ib lub teb chaws uas muaj ntau haiv neeg nyob thiab tas tsoom pej xeem tsuas muaj 7 plhom leej xwb. Cov neeg ntseeg nyob Los Tsuas teb yog 2 feem pua. Cov neeg Los Tsuas feem coob xav tias txais kev ntseeg yog txhaum cai. Txawm li cas los xij, muaj coob leej uas lawv txais kev ntseeg ntsiag to thiab zais nyob hauv lawv lub siab, vim lawv ntshai tsam nrov rau tom tej ces ho muaj neeg tuaj ua phem rau lawv thiab ntiab lawv tawm hauv zos. Tab sis cov tseem hwv nyob hauv tuam ceeb Vees Cas lawv nrog cov neeg ntseeg sib koom ua hauj lwm ua ke, kom tau qhia rau cov thawj coj hauv zej zog nyob pem toj siab paub tias : tseem hwv Los Tsuas muaj txoj cai txuag pov hwm cov neeg ntseeg thiab. Cov neeg Los Tsuas nyob deb nroog thiab nyob toj siab xav tias : kev txais kev ntseeg, mas yog tsis yuav cov neeg Los Tsuas lawm thiab lawv yog cov neeg txawv teb chaws tej tub teg tub taw. Vim tseem hwv As Mes Lis Kas yog tus sawv tsov rog nyob Los Tsuas teb thiab Nyab Laj teb. Nyob hauv cov haiv neeg tsawg nyob Los Tsuas teb, cov Hmoob kuj yog haiv neeg uas txais kev ntseeg thiab, ces lawv tau thaij thov cov thawj coj kom pab txuag cov neeg ntseeg, tab sis lawv tej lus tsis muaj qab hau dab tsi.