TUA KUV, TXHOB TUA COV PEJ XEEM

Ib tug Leej Phauj nyob Mias Mas teb hais rau cov tub ceev xwm tias : “Thov tua kuv, txhob tua tsoom pej xeem”. Leej Phauj As Nas Rose Nootaw txhos caug ntawm cov tub ceev xwm xub ntiag, thov kom txhob tua tsoom pej xeem thiab cov neeg sib sau tawm tsam. Qhov no ua rau tas ntiaj teb neeg ceeb thiab poob siab tas, thaum pom daim duab Leej Phauj Rose Nootaw txhos caug thov cov tub ceev xwm.

Leej Phauj Rose Nootaw yog ib lub cim ntawm kev sib koom siab nrog tsoom pej xeem Mias Mas. Tam sim no Mias Mas teb tab tom raug xwv txheej kub ntxhov yuav sib tawg los ntawm cov tub rog txeeb kav teb chaws lub hlis tag los.

Daim duab uas pom ib tug Leej Phauj Kav Tos Liv txhos caug ntawm cov tub ceev xwm xub ntiag tuav rawv phom, thiab thov kom cov tub ceev xwm txhob tua tsoom pej xeem, cov xwm no yog tshwm sim nyob hauv lub nroog Mis Kis Nas (Myitkyina City) uas nyob Mias Mas qaum teb. Ua rau tsoom pej xeem Mias Mas qhuas kawg, vim Mias Mas teb yog ib lub teb chaws uas cov neeg feem coob teev hawm Phus Thas kev cai.

Leej Phauj Rose Nootaw txhos caug thiab hais rau cov tub ceev xwm tias :

“Kuv yuav tsis sawv mus txog thaum nej khiav ntawm thaj chaw no mus”.

Lub ntsiab lus mas yog Leej Phauj thov kom cov tub ceev xwm khiav tawm ntawm thaj chaw lub tsev teev Ntuj. Lub sij hawm ntawd, muaj 2 tug tub ceev xwm cia li zaum hauv av thiab hawm Leej Phauj Rose Nootaw. Ob tug tub ceev xwm hais tias lawv yog ua raws cov hlob tej lus thiab ua raws lawv lub luag hauj lwm xwb.

Leej Phauj Rose Nootaw hais rau cov tub ceev xwm tias :     

“Yog nej yuav tua ib leeg zuj zus, mas thov nej tua kuv pauj, kuv txaus siab tuag”.

Tsoom pej xeem pib tawm tsam tiv cov tseem hwv tub rog Mias Mas txij hnub tim 1 lub 2 hlis tag los, uas yog hnub cov tub rog Mias Mas txeeb kav teb chaws.

Los txog tam sim no, twb muaj cov neeg tawm tsam raug tua tuag 60 leej lawm.

Leej Phauj Rose Nootaw hais rau lub rooj ntawv xov xwm BBC tias : lub sij hawm uas nws txhos caug ntawm cov tub ceev xwm xub ntiag, mas nws hais tias yog cov tub ceev xwm yuav tua neeg ib tug zuj zus, thov tua nws, vim nws txaus siab tuag.

Ces cov tub ceev xwm cia li khiav mus lawm. Lub caij ntawd, muaj coob leej me nyuam yaus nkaum nyob hauv tsev, lawv tsis pom qab yuav khiav mus qhov twg, vim sawv daws ntshai. Yog li Leej Phauj thiaj thov ua tus tuag kom tau pab cawm cov me nyuam.

Leej Phauj hais tias : “Cov me nyuam los zaum vij kuv, vim sawv daws tshaib plab, nqhis dej thiab ntshai. Tsis muaj leej twg tau luag tawm rov mus tsev”.

Hnub ntawd, cov tub rog xuas phom tua rau tej pab neeg sib sau tawm tsam coob coob nyob hauv lub nroog. Leej Phauj saib zoo li lub ntiaj teb no yuav tawg, vim suab phom nrov nqaj to qhov txhia chaw, ces Leej Phauj thiaj khiav mus nyob ntawm lub tsev teev Ntuj. Leej Phauj qw nrov nrov kom sawv daws tso cev pw hauv av, tab sis tsis muaj ib tug hnov li. Nyob tsis deb ntawm Leej Phauj, mas muaj ib tug tub hluas raug phom. Leej Phauj thiaj dhia mus saib, pom tus tub hluas ntawd raug phom saum taub hau thiab ntshav ntws nto, tus hluas ntawd pw nrog ib pawg ntshav. Leej Phauj xav muab tus tub hluas ntawd puag khiav, tab sis nws puag tsis taus, ces nws thiaj qw nrov nrov kom muaj neeg tuaj pab. Leej Phauj Rose Nootaw hais tias :

“Kuv lub ntsiab muag mob thiab ntsim ntxhi, kuv mob taub hau heev. Tab sis peb kuj muab tus hluas ntawd puag tawm tau los lawm. Lub sij hawm ntawd, cov me nyuam quaj zom pes zaws, vim sawv daws mob siab thiab ntshai”.