TUS QUB THAWJ TSWJ LUB TSHAJ XO RADIO VERITAS ASIA TAG SIM NEEJ

(Licasnews Photo)

Friday, June 25, 2021

Txiv Plig Anton Weerasing uas yav tag los nws yog tus thawj tswj lub tshaj xo Radio Veritas Asia tau tag sim neej lawm. Nws tuag hnub tim 9 lub 6 hli 2021 no, nws hnub nyoog muaj 82 xyoos.

Txiv Plig Anton Weerasing yug hnub tim 12 lub 6 hli xyoo 1939. Nws pib kawm ua tub tshaj Ntuj Lus xyoo 1959. 10 xyoo tom qab nws tau txais lub Cim Tiag Tes ua Txiv Plig. Nws tau txais daim ntawv pov thawj txheej siab hais txog kev tshaj xov tooj cua nyob Mas Nis Las.

Txiv Plig Anton Weerasing raug xaiv ua tus tuav xam ntawm Radio Veritas Asia lub 12 hlis xyoo 1975. Nws txoj hauj lwm yog saib xyuas cov zaj tshaj xo tuaj txawv teb chaws tuaj nyob hauv Radio Veritas Asia.

Nws tau pib lub tshaj xo xov tooj cua 12 xeem lus, uas yog lus Suav, lus Nyab Laj thiab lus Mias Mas ua ntej. Dhau ntawd mas tseem muaj xeem lus Bengali, Karen, Kachin, Japanese, Sinhala, Tamil thiab Hindi.

Qhov zoo ntawm Txiv Plig Anton Weerasing, mas yog nws tsis muab hlob thiab nws nyiam ua neeg me. Nws yog tus piv txwv zoo rau cov tub ntxhais hluas yav tag los thiab zim txwv no.

Tseem muaj ib tug Txiv Plig Yes Xus Is hu ua Nimal Ignatius Perera qhuas tias Txiv Plig Anton Weerasing yog Yes Xus tus tseem phooj ywg, vim nws muaj tus yam ntxwv zoo thiab muaj hmoov zoo heev.