TUS TXIV PLIG PAB TSOOM PEJ XEEM KOM TAU NEEJ ZOO

Txiv Plig Paj Lug Ho hnav ib lub ris xiav dawb muag lias thiab ib lub tsho tes luv qub qub, nws saib ib pab neeg kom lawv txhim ib co tsev nyob hauv tseem hwv thaj av. Txiv Plig hais tias : nws yuav sau cov neeg muag toob xib nyob ntawm tej ntug kev, kom mus nyob hauv cov tsev uas nws tso neeg txhim. Yog tias cov tsev ntawd txhim tiav, mas cov neeg muag toob xib nyob ntawm tej ntug kev yuav mus nyob hauv cov tsev ntawd. Ua li mas cov neeg muag toob xib lawv yuav muaj chaw nyob zoo, ces lawv kaj siab thiab tau kev nrhiav nyiaj yug lawv tsev neeg. Txiv Plig Ho lub hom phiaj yog txhim vaj tse rau cov neeg tsis muaj vaj tsev nyob, kom lawv tau nyob ua lawv lub neej. 
Xyoo 2016, Txiv Plig Ho tau txais nws lub luag hauj lwm ua hauj lwm nyob hauv thaj tsam Thanh Tam, nyob hauv lub nroog Bao Loc. Txiv Plig pua pob zeb rau lub tshav puam tsev teev Ntuj, nws ua lub qhov tsua txawb tus mlom Niam Mab Liab thiab ua ib lub tsev rau cov me nyuam yaus nyob ua si thiab ua kev lom zem, tsis hais noj tshoob los sis pam tuag. Nyob hauv lub zos ntawd, muaj 5,500 tus neeg. Lawv lub keeb puam yog tsiv los ntawm Nyab Laj qaum teb los xyoo 1954, uas yog xyoo cov koom tshaj yeej ntsuj rog Fab Kis. Txiv Plig Ho muaj 64 xyoos lawm, nws qhia ntawv Aas Kiv, qhia ntaus suab paj nruag thiab qhia tej me nyuam yaus ntaus tes taw. 
Txiv Plig Ho txoj kev ua hauj lwm, hloov tsoom pej xeem lub neej lawm ntau heev. Muaj ib tug neeg ntseeg hais tias : tom qab uas nws thiab nws tus me nyuam txhos caug thov Niam Mab Liab, mas muaj coob leej nquag tuaj sib sau teev Ntuj thiab xa lawv tej me nyuam tuaj kawm kev ntseeg. Muaj ib txhia nrog Txiv Plig ua tej hauj lwm hauv tsev teev Ntuj. Lawv txoj kev tsheb nyob hauv lub zos kuj pua pob zeb thoob plaws. Yav tag los mas yog kev av nkos nkos xwb. Tsis tas li ntawd, Txiv Plig tseem ua ib lub tsev rau sawv daws tau ua kab ke thiab ua hmoov lom zem. Thaum muaj tej nkawm niam txiv sib yuav, mas lawv noj tshoob nyob hauv lub tsev ntawd. Ces pab txuag lawv tej nyiaj lawm ntau, vim tsis raug mus ua tshoob nyob hauv tej lub tsev ntiav los sis tsev noj mov. Txiv Plig kuj ua tej lub tsev rau cov neeg uas tsis muaj nyiaj them nqi tsev nyob. Txiv Plig Ho txais lub Cim Tiag Tes xyoo 1985, ces nws ua tus pab tus Txiv Plig nyob hauv lub zos Madagoui Parish, nyob hauv lub nroog Da Huoai, lub xeev Lam Dong. Xyoo 1999, Txiv Plig Ho ua thawj lub tsev teev Ntuj nyob hauv thaj tsam Da Teh uas nyob tsis deb ntawm lawv pes tsawg, thiab nyob thaj tsam ntawd tsis tau muaj ib lub tsev teev Ntuj li. Txiv Plig pib ua cov hauj lwm pab neeg thiab qhia kev ntseeg. Cov neeg uas txais kev ntseeg feem coob yog haiv neeg K’Ho. Yav tag los lawv yuav tsum mus ko taw li 20-30 km kev mus teev Ntuj nyob hauv lub tsev teev Ntuj Madaguoi. 
Txiv Plig Ho yog thawj tug tub tshaj Ntuj lus nyob De Teh. Muaj 1,500 tus neeg ntseeg nyob ntawd. Tib xyoos ntawd, muaj cov neeg txais kev ntseeg coob kawg. Ces xyoo 1999 thiaj muaj li ntawm 500 tus neeg los txais kev ntseeg nyob hauv lub Koom Txoos Kav Tos Liv. Kev kawm ntawv, yog tus yawm sij txhim kho tib neeg lub neej. Yog tias tsis muaj kev kawm, mas sawv daws lub neej yeej yuav tsis zoo tuaj thiab tsis vam meej. Ib tug neeg muag paj ntoos nyob Da Teh hais tias : Txiv Plig Ho zoo li yog ib tug txiv nraug nab ntawm lawv thiab yog tus neeg lawv qhuas, vim Txiv Plig Ho siv tag nws lub neej los pab kom sawv daws lub neej zoo tuaj.