TUS TXIV PLIG TXHAWB NQA PEJ XEEM KEV COG KOB SWM TSHUAJ

Txiv Plig As Foos Xos Biru Kira txoj kev tshaj Ntuj Lus nyob Pas Puas, mas ntau xyoo los no yog pib nyob sab hnub tuaj kawg nkaus ntawm Is Ntos Nes Xias teb xyoo 2007. Txiv Plig As Foos Xos Biru Kira yog ib tug tub tshaj Ntuj Lus zwm rau lub Koom Haum Yes Xus Is nyob Ntsas Kas Tas. Nws raug xa mus pab cov neeg ntseeg Christ Our Friends nyob hauv thaj tsam Nabire hauv Pas Puas. Txiv Plig nyob hauv lub zos ib xyoos, mas nws pom tias tsoom pej xeem nyob Pas Puas muaj ntau yam teeb meem ntawm kev ua noj ua haus. Vim tsoom pej xeem nyob thaj tsam ntawd feem coob yog neeg pluag txom nyem, lawv tsis tau txais kev ncaj ncees thiab tseem muaj ib txhia raug kev kub ntxhov. Thaum Txiv Plig rov mus kawm txuas ntxiv nyob hauv lub tsev kawm ntawv txheej siab hwm Leej Ntshiab Is Nes Xias nyob Ntsas Kas Tas, mas cov teeb meem no yog ib yam uas Txiv Plig hnov qab tsis tau kiag li. Muaj ib hnub Txiv Plig As Foos Xos tau txais lus tso cai ntawm lub Koom Haum Yes Xus Is kom mus tshaj Ntuj Lus nyob hauv lub Cheeb Koom Txoos Pas Puas, ces xyoo 2012, Txiv Plig thiaj tau rov mus Pas Puas. 3 xyoos tom qab, lub Cheeb Koom Txoos Timika nyob Pas Puas lees txais Txiv Plig ua ib tug tub tshaj Ntuj Lus zwm rau lub Cheeb Koom Txoos. Txiv Plig As Foos Xos tshaj Ntuj Lus nyob ntawd thiab nws pab tsoom pej xeem txuag lawv tej kab lis kev cai. Txiv Plig kuj txhawb nqa tsoom neeg ntseeg txoj kev cog kob swm tshuaj (Coffee), vim kob swm tshuaj yog ib yam muaj nqis nyob thoob ntiaj teb. Tsis tas li ntawd cov neeg ntseeg yuav luag txhua yim puav leej cog kob swm tshuaj. Txiv Plig pab yuav cov txiv kob swm tshuaj ntawm tsoom pej xeem thiab coj mus zom ua hmoov ntim rau hauv hnab. Txiv Plig xa cov kob swm tshuaj ntawd coj mus muag rau tej tsev muag kob swm tshuaj nyob hauv thaj tsam thiab lub nroog Nas Npis uas nyob sib ze.