TXWM 325 XYOOS NTAWM LUB KOOM HAUM LEEJ PHAUJ SPC

Friday, March 12, 2021

Hnub tim 16 lub 2 hlis no, pab Leej Phauj Saint Paul of Chartres tau ua cov kab ke nco txog lub Koom Haum Saint Paul of Chartres tsa los txwm 325 xyoos, nyob hauv lub tsev teev Ntuj Assumption, hauv tuam ceeb Bangkok. Muaj tus Tswv Qhia Liab Francis Xavier Kriengsak ua tus coj lub Txoos koom nrog 10 leej Tswv Qhia nyob Thaib teb, thiab cov Txiv Plig 200 tawm leej. Tas huv si cov Leej Phauj nyob hauv lub Koom Haum Saint Paul de Chartres puav leej tuaj sib sau koom ua kev zoo siab. Lawv sib koom ua Ntuj tsaug, yog lawv txoj kev hlub uas muaj rau ib zeej tsoom neeg thiab zoo siab txhawb nqa lub Koom Txoos nyob Thaib teb. Lawv thov kom cov neeg ntseeg uas yog cov poj niam ncaj ncees thiab ntseeg txog lawv tes hauj lwm.

Lub Koom Haum Saint Paul de Chartres Congregation txhim tsa nyob hauv xyoo 1696, uas muaj Txiv Plig Louis Chauvet yog tus Txiv Plig nyob hauv lub zos Levesville-La-Chenard, yog ib lub zos me me nyob Fab Kis teb. Thov kom Leej Phauj Mary Anne de Tilly ua thawj tug Leej Phauj tsa lub Koom Haum, kom tau pab cov neeg pluag txom nyem nyob hauv lawv lub zos.

Xyoo 1895 pab Leej Phauj Saint Paul de Chartres tau tuaj saib lub tsev kho mob Saint Louis nyob Thaib teb. Xyoo 1897 Saint Paul de Chartres tau txhim tsa thawj lub tsev kawm ntawv uas hu ua Santa Cruz Convent. Tam sim no muaj 231 tus Leej Phauj saib xyuas, muaj 22 lub tsev kawm ntawv thiab 6 lub tsev saib xyuas cov neeg mob nyob hauv ntau lub nroog. Cov Leej Phauj lawv pab cov Txiv Plig qhia kev ntseeg thiab lawv mus tsham xyuas cov neeg pluag txom nyem thiab cov neeg laus.