UA HMOOV TSUJ XEEB TSEV TEEV NTUJ HWM NIAM MAB LIAB YEES TAWM NYOB NROOG LUJ HAUV XEEV PHEB CHAS NPOOS.

Cov ntseeg ua hmoov tsuj xeeb tsev teev Ntuj hwm niam Mab Liab yees tawm nyob nroog Luj hauv xeev Phetchabun, Cheeb Koom Txoos Nakhornsawan, Thaib teb.
Hnub tim 15 lub 2 hlis tas los no, nyob hauv xeev Phetchabun, Cheeb Koom Txoos Nakhornsawan, Thaib teb tau ua hmoov tsuj xeeb rau tsev teev Ntuj hwm niam Mab Liab yees tawm nyob nroog Luj. Muaj Tswv Qhia Joseph Pibul Visinonthachai tus tswj Cheeb Koom Txoos tuaj ua thawj pwm tsav coj cov ntseeg ua kab ke teev Ntuj nyob hauv lub Txoos. 
Nyob hauv Txoos Teev Ntuj, tau nyeem Ntawv Moo Zoo hais txog thaum Huab Tais Yes Xus ua thawj lub cim nyob hauv rooj tshoob hauv zos Kas Nas raws li Zam Ntawv Moo Zoo tau sau tseg. Tswv Qhia Pibul nthuav tias nyob hauv zaj no peb yuav pom niam Mab Liab tau pab kom rooj tshoob tiav thiab txhob muaj xwv txheej. Tswv Qhia hais ntxiv tias yog peb saib niam Mab Liab lub neej, mas peb yuav pom tias niam Mab Liab yog leej niam nrog nraim Huab Tais Yes Xus thiab raws Huab Tais Yes Xus qab mus txog ntua saum roob Kos Kos Tas. Niam Mab Liab yog tus qauv rau peb taug, yog li peb thiaj tsa koob tsheej hwm txog niam Mab Liab nyob hauv hnub no.
Dhau ntawm lub Txoos teev Ntuj lawm, hnub no tseem yog ib hnub cov txij nkawm yuav tau rov xam txog lawv txoj kev cog lus ua txij ua nkawm thiab, yog li Tswv Qhia thiaj kom sawv daws rov qab cog lus nyob hauv Tswv Ntuj tias yuav coj lub neej txij nkawm mus kom txog hnub tuag.
Nyob ntawm cov Leej Choj thiab Leej Phauj, lawv kuj rov cog lus coj lub neej twj cuab rau Tswv Ntuj tib yam nkaus.
Tom qab lub Txoos Teev Ntuj lawm, Tswv Qhia Pibul tau coj sawv daws hwm niam Mab Liab tus mlom raws kab ke.

Tus sau : Muas Lauj, Zoo Tswv Zov Yaj