VAJ QHIA FAS NTSHIS KUS TSIS YOG THAWJ TUS VAJ QHIA TUAJ NTAWM AWS LOS PAS TEB TUAJ

Vaj Qhia Fas Ntshis Kus tsis yog thawj tug Vaj Qhia nyob Aws Los Pas teb, Vaj Qhia Fas Ntshis Kus yog neeg As Zees Tis Nas (Argentina). Nws yug nyob hauv lub nroog Npuas Nos Ais Lem (Buenos Aires), nws tsev neeg yog neeg Is Tas Lias khiav ua thoj nam ntawm Is Tas Lias teb tuaj mus nyob As Zees Tis Nas teb. Tus Tswv Qhia ntawm Los Mas (Rome), los sis sawv daws paub lub npe hu ua : “Vaj Qhia (Pope)”. Nws yog tus thawj coj ntawm cov neeg ntseeg Kav Tos Liv uas muaj 1,300 plhom leej neeg nyob thoob ntiaj teb thiab yog tus thawj coj ntawm txoj kev teev hawm Kav Tos Liv. Vaj Qhia txoj hauj lwm : (1) Qhuab qhia tsoom neeg ntseeg. (2) Saib kev ncaj ncees ntawm cov neeg ntseeg nyob thoob ntiaj teb. (3) Saib xyuas hauj lwm kev teev hawm thiab pab pawg hauv cov neeg lis hauj lwm hu ua Roman Curia. Vaj Qhia txhais tias txiv, zoo ib yam li ib tug txiv tsev saib xyuas kev noj qab nyob zoo rau tas tsoom neeg ntseeg Kav Tos Liv nyob thoob ntiaj teb. Dhau ntawm kev ua tus coj txoj kev teev hawm Kav Tos Liv lawm, Vaj Qhia kuj yog tus thawj tswj lub xeev Vas Tis Kas uas hu ua Holy see. Vaj Qhia muaj cai ntsib txhua txhua tus thawj coj ntawm txhua lub teb chaws nyob ntiaj teb no. Vaj Qhia nrog cov thawj coj sib fim thiab sib cog kom muaj tiam lis, thiab qhia kom tas ntiaj teb paub txog Vas Tis Kas. Vim Vaj Qhia yog tus thawj coj ntawm txoj kev teev hawm Kav Tos Liv thiab yog tus thawj tswj lub xeev Vas Tis Kas, mas ua rau ib zeej tsoom neeg ntseeg txog nws thiab hwm nws. Nyob hauv txoj kev ntseeg, mas Vaj Qhia muaj 2 yam xws li, tau hais li cas lawm yuav tsum ua li ntawd, hais lus ncaj thiab teem caij yog caij. Vaj Qhia muaj lub npe tiag hu ua Fas Ntshis Kus (Francis). Ua ntej Vaj Qhia yuav raug xaiv los ua Vaj Qhia, mas nws lub npe hu ua Ntsos Ntses, Mas Lis Os, Npes Nkos Nqhos Lis, (Jorge Mario Bergoglio). Dhau ntawm xeem lus Xyis Pas Yas (Spain) thiab Is Tas Lias lawm, Vaj Qhia Fas Ntshis Kus tseem hais tau xeem lus Zes Mas Nias, lus Fab Kis thiab lus Aas Kiv zoo heev. Xyoo 1913, As Zees Tis Nas yog ib lub teb chaws nyob hauv 10 lub teb chaws nplua nuj, tab sis As Zees Tis Nas teb pib raug teeb meem ntawm kev lag luam nyob hauv tiam 20 thiab muaj kev kub ntxhov ntau yam nyob hauv lub teb chaws, ces thiaj ua rau As Zees Tis Nas poob rau txoj kev txom nyem. Xyoo 2001 -2002, As Zees Tis Nas teb rov raug xwv txheej loj kawg, ces tsoom pej xeem 57 feem pua nyob hauv nroog thiaj yog cov neeg txom nyem.