Vas Tis Kas qhuas cov pej xeem Thaib uas lawv muaj kev ncaj ncees rau tsoom pej xeem nyob hauv Vaj Qhia hnub

Vas Tis Kas qhuas txog cov pej xeem Thaib uas lawv muaj lub siab dawb siab zoo los ntawm Leej Ntshiab Nqes Nkos Lis, uas nws yog ib tug tau txais qhov paj tshab muaj nqis tshaj uas lub Koom Txoos Kav Tos Liv muab rau cov neeg ntseeg. 

Somsak Leeswadtrakul yog ib tug tswv tsev tsim tawm thiab muaj lub siab zoo, nws tau txais lub meej mom ntawm Knights Grand Cross, nyob rau hauv Vaj Qhia hnub uas yog hnub tim 30 lub 6 hli tag los.

Cov kab ke no npaj nyob hauv lub tsev txais qhua Arnoma Grand Hotel, thiab ncaj rau hnub hwm Leej Ntshiab Pob Zeb thiab Leej Ntshiab Paj Lug, thiab kuj yog hnub uas txwm 10 xyoo ntawm Vaj Qhia Fas Ntshis Kus tau txais lub meej mom.

Knights Grand Croos yog lub meej mom siab tshaj ntawm Order, tau qhuas txog Somsak Leeswadtrakul kev ua hauj lwm pab neeg thiab muab nws tus kheej ua hauj lwm rau lub Koom Txoos Kav Tos Liv hauv lub teb chaws thiab cov neeg ntseeg yam tsis hloov siab li. 

Vas Tis Kas muab qhov paj tshab txawv rau nws, nyob hauv kev lees paub qhov nws muab siab rau ua hauj lwm thiab cog kev phooj ywg nyob hauv kev thaj yeeb, nrog tsoom pej xeem Thaib, nrog As Xias thiab thoob ntiaj teb sib haum xeeb.

Somsak Leeswadtrakul yog ib tug Kav Tos Liv uas coj kev ntseeg nruj, nws muaj kev sib tham txog kev teev hawm ntawm cov Phus Thas, cov neeg ntseeg thiab lwm txoj kev teev hawm. Ntau xyoo uas nws thiab tsev neeg ua hauj lwm pab daws cov neeg pluag txom nyem txoj kev nyuaj siab, cov neeg ua lub neej nyias ntsais thiab cov neeg tsis muaj tus saib xyuas. 

Xyoo no, Vas Tis Kas qhuas txog Thinakorn Kitcharoen tus tau txais qhov paj tshab Order of St. Gregory the Great, vim nws cov hauj lwm zoo thiab kev ua hauj lwm pab luag tej. Ib yam li 5 tus neeg hauv lub Cheeb Koom Txoos Tha Rae uas nyob toob  fab pej hauv Thaib teb.  

Thinakorn Kitcharoen yog muag tswm ciab paj ntoos thaum lub Koom Txoos ua cov hmoov tsuj xeeb, thiab nyob hauv 30 xyoo dhau los nws tau muab nws cov nyiaj uas tau los ntawm nws muag tswm ciab paj ntoos pub rau lub tsev teev Ntuj hauv nws lub zos Song Khon, uas nyob ntawm Mukdahan ciam teb.

Qhov paj tshab Order of Saint Gregory the Great yog Vaj Qhia Gregory tim 16 ua tus teeb tsa, nyob hauv hnub tim 1 lub 9 hlis xyoo 1831. Kom tau pauj txiaj ntsig rau cov neeg txuag tiv thaiv Vas Tis Kas hauv lub caij cov teb chaws Aws Los Pas ua ntxhov quav niab, vim kev sib txeeb ntawm cov Los Pav nyob Fab Kis teb thiab kev txeem ntaus teb chaws ntawm tus vaj Napoleon.