Hnub Chiv Tim 1 Lub 10 Hli 2023 (Sunday Homily)

Hnub Chiv Tim 8 Lub 10 Hlis 2023

Lub caij Nyob Nruab Xyoo

Mas Tais 21:33-43

“Lub pob zeb uas cov tub txhim tsev muab pov tseg, yog lub pob zeb txheem lub ncov ruv tsev.”

Nyob zoo…

Kwv tij zoo nyiam sawv daws, zaj paj lug hauv Ntawv Moo Zoo hnub no piav txog cov tub zog zov teb tua neeg. Tus tswv teb txhais tias Tswv Ntuj, los sis Huab Tais Leej Txiv. Ib co neeg uas zov thaj txiv cawv txhais txog cov thawj leej choj thiab cov Fas Lis Xais. Cov tub txib uas tus tswv teb xa yog cov yaj saub, thiab qhov kawg mas tus tswv tus tub txhais tias Leej Pleev, los yog Tswv Ntuj Leej Teeb twm zeej uas yog Huab Tais Yes Xus. Huab Tais Yes Xus hais zaj paj lug no kom qhia rau cov thawj leej choj thiab cov Fas Lis Xais paub txog lawv tab tom xav yuav kev, lawv tab tom qhia yuav kev thiab lawv tab tom coj yuav kev cov pej xeem. Haiv neeg His Xas Lais yog ib haiv neeg uas Tswv Ntuj xaiv kom kev cawm neej tshwm sim thiab tawj paj txi txiv rau lwm haiv neeg kom tau txais kev cawm thiab. Tab sis mas cov His Xa Lais no tsis txais Huab Tais Yes Xus cov lus qhia, lawv ntseeg lawv tus kheej. Lawv tsis ntseeg cov yaj saub uas Tswv Ntuj xa tuaj qhia lawv thiab lawv tsis ntseeg Huab Tais Yes Xus uas yog Tswv Ntuj Leej Tub twm zeej. Vim li ntawd, Huab Tais Yes Xus thiaj hais tias “Ntuj yuav thau lub Ceeb Tsheej ntawm nej los cev rau ib haiv neeg uas yuav muab siab rau tu kom txi txiv.”

Kwv tij sawv daws, peb pom zoo lawm tiag tias cov His Xas Lais tsis kam txais Ntuj Lo Lus qhia, ntawm peb mas, thaum peb txais lub Cim Ntxuav peb yog Tswv Ntuj tus tub tus ntxhais, Tswv Ntuj xaiv peb kom coj lwm haiv neeg los paub Tswv Ntuj. Tswv Ntuj xaiv peb los ua tim khawv txog Tswv Ntuj kev nyiam kev hlub, txog Tswv Ntuj lub Koob Meej rau sawv daws tau ntsib tau pom. Tswv Ntuj xaiv peb lawm, peb yuav ua raws li nws hais los tsis ua kuj txoj li peb. Peb yuav ua kom Tswv Ntuj kev nyiam kev hlub tawg paj txi txiv rau sawv daws pob los tsis ua, kuj txoj li peb. Tab sis mas, txhob tsis nco qab tias Huab Tais Yes Xus hais tias yog nej tsis muab siab ua, yog nej tsis ua raws li Tswv Ntuj lub siab nyiam, tsis u axis Tswv Ntuj siab, “Ntuj yuav thau lub Ceeb Tsheej ntawm nej los cev rau ib haiv neeg uas yuav muab siab rau tu kom txi txiv.”

 Kwv tij hmoob sawv daws, peb yog cov neeg ntseeg txog Tswv Ntuj, peb ntseeg txog Huab Tais Yes Xus, peb thiaj mloog nws lo lus txhua hnub, peb thiaj ua neej raws li Yes Xus lo lus qhia, peb thiaj ua tim khawv txog Lub Moo Zoo. Thov kom peb ua neej zoo li “Lub pob zeb uas cov tub txhim tsev muab pov tseg, yog lub pob zeb txheem lub ncov ruv tsev. Qhov ntawd yog tuaj ntawm Huab Tais tuaj. Yog ib yam zoo nkauj zoo saib rau ntawm peb qhov muag.” Peb txhua tus yog lub pob zeb txheem lub ncov ruv tsev. Peb yog ib lub pob zeb sib koom txhim Huab Tais Yes Xus lub Koom Txoos. Vim li ntawd, peb yuav tsum sib koom siab koom ntsws, sib pab sib koom tes txhawb nqa lub Koom Txoos, thov Ntuj luag tej. 

Thov Tswv Ntuj foom koob foom hmoov ua kom nej sawv daws kaj siab lug mog!