Hnub Chiv Tim 10 Lub 12 Hlis 2023 (Sunday Homily)

Hnub Chiv tim 10 Lub 12 Hlis Ntuj 2023
Lub Caij nyob Tos Huab Tais
Mas Kos 1:1-8

“Cov lus chiv lub Moo Zoo hais txog Yes Xus Pleev, Tswv Ntuj Leej Tub.”

Cov kwv tij zoo nyiam sawv daws, ntawm no mas yog hnub chiv lub lis piam tim 2 hauv lub caij Tos Huab Tais. Lub ntsiab lus ntawm lub lis piam no yog kev thaj yeeb. Huab Tais Yes Xus yog kev thaj yeeb loj tshaj plaws ntawm tib neeg nyob thoob ntiaj teb no. 
Ntawv Moo Zoo hnub no mas yog zaj tim ib ntawm Mas Kos Ntawv Moo Zoo. Nws hais tias: “Cov lus chiv lub Moo Zoo hais txog Yes Xus Pleev, Tswv Ntuj Leej Tub.” Ntawm no mas Mas Kos siv lo lus “lub Moo Zoo” txhais tias Huab Tais Yes Xus yog lub Moo Zoo uas Mas Kos yuav tshaj tawm rau peb paub. Thaum peb hnov lub moo zoo lawm ces, peb yuav tsum ua tim khawv txog lub Moo Zoo no ntxiv mus.
Zam Ntxuav Plig yog thawj tus tim khawv txog lub moo zoo. Nws yog tus tshaj tawm kom sawv daws npaj siab npaj ntsws tos txais Tswv Ntuj Leej Tub. Nws tshaj xo mus ua Yes Xus ntej. Tus qw hauv teb chaws quav poj lub suab hais tias: Nej npaj txoj kev rau Huab Tais, nej kho nws cov hauv kev kom ncaj.” Lub Moo Zoo lo lus no “Nej npaj txoj kev rau Huab Tais, nej kho nws cov hauv kev kom ncaj” yog lub ntsiab lus ntawm hnub chiv no. peb yuav tsum npaj peb txoj kev kom ncaj. Txoj kev no yog peb tus kheej lub neej xwb. Lub caij Tos Huab Tais no yog lub caij uas peb yuav tsum saib ntawm yus lub neej, thiab saib ntawm qhov zoo thiab tsis zoo muaj dab tsi. Ces, peb yuav tsum hloov lub neej tshiab, ua kom ncaj. Peb tso qhov tsis zoo pov tseg, ces tsuas ua qhov zoo xwb. Ntxiv mus ces peb yuav saib ntawm yus tus kheej zoo li cas thiaj paub os? Thov peb saib ntawm zaj “kuv lees txhaum” muaj lo lus hais tias “kuv lub siab xav txhaum, kuv lub ncauj hais txhaum, thiab kuv lub cev ua txhaum.” Zoo li no mas, kwv tij sawv daws, peb lub siab, lub ncauj, thiab lub cev xav ua txhaum zuj zus. Li ntawd, peb thiaj yuav tsum ceev faj peb lo lus hais, peb kev xav, thiab yam peb ua. Tsis tas li ntawd, kuj muaj Huab Tais Ntuj 10 lo lus qhia peb saib thiab ras txog tau. Peb nug peb tus kheej tias:
Kuv puas teev Huab Tais Ntuj ib tug xwb, kuv puas nyiam Huab Tais Ntuj tshaj tas puas tsav yam?
Kuv puas hwm Huab Tais Ntuj lub npe? 
Kuv puas caiv Huab Tais Ntuj hnub?
Kuv puas kwm kuv niam kuv txiv?
Kuv puas tua neeg los ua mob rau luag tej?
Kuv puas zes luag txij luag nkawm?
Kuv puas ua tub sab tub nyiag?
Kuv puas dag rau luag tej?
Kuv puas tso kuv lub siab ntshaw zes luag txij luag nkawm?
Kuv puas tso kuv lub siab ntshaw ua tub sab tub nyiag?
Lo lus xauv mas, kuv puas nyiam Tswv Ntuj thiab nyiam kuv cov kwv tij neeg tsa sawv daws?
Kwv tij sawv daws, thov peb siv lub sij hawm ras txog cov lus nug no. yus nug yus thiab yus teb yus tus kheej xwb os. Tsis muaj leej twg paub, tsuas yog yus tus kheej thiab Tswv Ntuj xwb thiaj paub. Peb ua li no kuv vim rau qhov hais tias peb xav npaj peb txoj kev kom ncaj, peb npaj peb lub siab lub ntsws kom txhij txais Me Nyuam Yes Xus hauv peb lub neej. 

Lub ntsiab lus ntawm lub lis piam tim ob hauv lub caij Tos Huab Tais no mas yog kev thaj yeeb. Vaj Qhia Francis hais tias: “thov kom peb yog qhov pom kev ci ntawm nroog Bethlehem, yog tus coj kev kaj siab lug thiab kev thaj yeeb rau qab ntuj neeg.” Ua li ntawd mas kwv tij hmoob sawv daws, thov foom koob foom hmoov rau peb kom peb muaj kev thaj yeeb hauv peb lub siab lub ntsws thiab thov kom peb yog tus ua kom kev thaj yeeb tshwm sim tuaj hauv peb neej, hauv peb cov kwv tij neeg tsa sawv daws.