Hnub Chiv Tim 10 Lub 17 Hlis 2023 (Sunday Homily)

Hnub Chiv tim 17 Lub 12 Hlis Ntuj 2023

Lub lis piam tim 3
Lub caij Tos Huab Tais Yes Xus
Zam 1:6-8, 19-28

“Tus ntawd tsis yog qhov pom kev, tab sis nws yuav ua tim khawv txog qhov pom kev.”

Nyob zoo,…
Cov kwv tij sawv daws, lub lis piam no yog lub lis piam tim 3 hauv lub caij Tos Huab Tais. Peb tab tom npaj peb txoj kev los peb lub neej kom txhij txais Huab Tais Yes Xus. Tsis tas li ntawd, lub Moo Zoo hnub no mas kuj caw peb sawv daws ras txog peb luag hauj lwm ib yam li Yes Xus cov tim khawv thiab. Lub luag hauj lwm ntawm cov ntseeg txog Yes Xus mas yog kev ua tim khawv txog qhov pom kev.
Huab Ntawv Moo Zoo mas, Zam Ntxuav Plig yog tus ua tim khawv txog qhov pom kev. “Qhov pom kev ci hauv qhov tsaus ntuj, qhov tsaus ntuj thaiv tsis tau qhov pom kev.” Tswv Ntuj Lo Lus tsim nyog uas peb yuav ras txog tshwj xeeb hauv lub Caij Tos Huab Tais no. Lub neej hauv lub qab ntuj no muaj ob yam uas nyob ua ke tsis tau. Yog qhov pom kev thiab qhov tsaus ntuj. Qhov pom kev yog qhov zoo,kev ncaj ncees, Ntuj
 lub txiaj ntsim, kev foom hmoov zoo thiab yog Tswv Ntuj. Qhov tsaus ntuj mas yog qhov tsis zoo, kev phem kev tsis zoo, kev tsis ncaj ncees los kev txhaum. Zam thiaj piav Yes Xus txog qhov pom kev uas ci hauv qhov tsaus ntuj thiab qhov tsaus ntuj los kev phem, kev tsis zoo, thiab kev txhaum thaiv tsis tau qhov pom kev no.
cov kwv tij sawv daws, ntawm peb mas, peb cov neeg ntseeg lub neej yuav tsum ua tim khawv txog qhov pom kev no, uas yog Huab Tais Yes Xus. Thiab, tsis tas li ntawd, peb cov ntseeg sawv daws yuav tsum ua neej yog qhov pom kev rau lwm tus thiab. Peb yuav tsum ua peb txoj kev kom ncaj taug hauv txoj kev ncaj kev zoo.
Kev ua tim khawv txog Yes Xus tseem txhais ntxiv tias thaum yus cov kwv tij neeg tsa tseem taug txoj kev tsis zoo, tsis ncaj, yus yuav tsum muaj cuab kav ua qhov pom kev rau lawv, yus yuav tsum muaj cuab kav hais rau lawv, qhov no tsis yog, qhov no tsis zoo, qhov no tsis ncaj. Kev tshaj lub Moo Zoo uas zoo tshaj plaws yog kev ua neej piv ntxwv rau lwm tus pom. Tsis yog hais lus ntau ntau xwb, tab sis mas, peb yuav tsum ua neej yog qhov pom kev rau luag tej pom, peb yuav tsum ua neej piv ntxwv zoo rau pom thiab ua raws li peb ua. Zoo li hnub no, Zam ua tus yam ntxwv rau peb. “Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws.Tus ntawd tsis yog qhov pom kev, tab sis nws yuav ua tim khawv txog qhov pom kev.” 

Cov kwv tij zoo nyiam sawv daws, kuv xav tias muaj ntau yam qhov uas tsis tshua zoo hauv peb lub neej thiab. Yog muaj qee yam peb ua luag tej nyob tsis zoo, thiab yog muaj lo lus phem peb hais rau luag tej, thov peb hloov yus tus kheej kom tshiab. Thov txim rau luag, thov txim rau Tswv Ntuj, muaj siab loj tig los yuav lub siab tshiab.  Vim tias thaum peb ua lub siab lub ntsws kom dawb kom huv tas lawm, peb thiaj tsim nyog txais Tswv Ntuj los nyob hauv peb lub neej. Tswv Ntuj yuav foom hmoov zoo rau peb thiab peb tsev neeg, ua kom peb noj qab nyob zoo, ua kom peb muaj kev vam meej, ua kom peb hlob tuaj hauv txoj kev ntseeg, thiab ua kom peb nyob siab kaj lug!
Nyob xyoo sawv daws!