Hnub Chiv Tim 11 Lub 6 Hlis 2023 (Sunday Homily)

Hnub Chiv Tim 11 Lub 6 Hlis Ntuj 2023
Lub cail Nyob Nruab Xyoo
Zam 6:51-58
“Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li.”

Hnub chiv no yog hnub nyoog hwm lub Cim yug los peb hwm Huab Tais Yes Xus lub Cev thiab cov Ntshav. Lus As Kiv hu tias Feast of Corpus Christi. Lub Cim yug yog dab tsi? Ua cas peb ho ua hmoov nco txog hnub no?
Lub cim yug txhais tias Yes Xus lub cev thiab Yes Xus cov ntshav. Yes Xus lub cev kuv hais txog ntawm no muaj cov nqaij thiab cov ntshav. Muaj ob yam. Thov nej sawv daws nco ntsoov kom zoo. Tsis yog nqaij xwb. Muaj nqaij thiab ntshav.
Peb txais Yes Xus lub cev hauv lub thaj txi ntuj los peb hais “txais lub cim yug.” Vim tias lub thaj txi Ntuj yog kab ke tseem ceeb tshaj plaws nyob hauv lub koom txoos Catholic txoj cai. Nyob hauv lub thaj txi Ntuj, txiv plig foom hmoov zoo rau lub ntsuav mov thiab cov cawv kom txia ua Yes Xus lub cev thiab cov ntshav rau peb tos txais, yug peb txoj sia, yug peb tus plig. Vim li ntawd, lub ntsuav mov thiab cov cawv uas txia ua Yes Xus lub cev thiab cov ntshav yog qhov tseeb, Huab Tais Yes Xus nyob ntawm lub Cim Ntshiab no tiag tiag. Cov xav tias lub ntsuav mov thiab cov cawv tsis yog Huab Tais Yes Xus lub cev thiab cov ntshav yuav kev tiag tiag, yuav kev tshaj plaws. Peb Kas Tos Liv tsis ntseeg li ntawd. Peb cov neeg ntseeg Kas Tos Liv ntseeg tias yog Huab Tais Yes Xus lub cev tiag tiag.
Vim li ntawd, lub thaj Txi Ntuj yog kab ke tseem ceeb tshaj plaws hauv lub Koom Txoos Kas Tos Liv. Peb yuav tsum tuaj koom kab ke txi Ntuj, tuaj mloog Ntuj lo lus, txais Yes Xus lub cev thiab cov ntshav. Huab Tais Yes Xus hais tias “Kuv hais qhov tseeb rau nej: yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej. Hos tus nuj kuv lub cev nqaij thiab haus kuv cov ntshav, nws muaj txoj sia nyob mus li.” Yog tsis muaj dej num tseem ceeb, thov caw nej sawv daws tuaj koom thaj txi Ntuj niaj hnub chiv. Thiab kev mus koom Thaj Txi Ntuj hnub chiv yog lub Koom Txoos Catholic txoj cai uas cov ntseeg yuav tsum ua. Qhov no yog lo lus teb tias ua cas peb ho ua hmoov nco txog lub Cim yug? 
Nej sawv daws nco ntsoov tias Yes Xus hais rau peb cov neeg ntseeg sawv daws tias “Nej txais, qhov no yog kuv lub cev thiab kuv cov ntshav. Yog ntshav cog lus, uas yuav ntws los pab tsoom neeg.”
Thov nej sawv daws tuaj koom lub thaj txi Ntuj, tuaj txais lub Cim yug, thiab thov nej sawv daws noj qab nyob zoo mog.