Hnub Chiv Tim 12 Lub 11Hli 2023 (Sunday Homily)

Hnub Chiv tim 12 Lub 11 Hlis Ntuj 2023

Lub lis piam tim 32 hauv lub caij nyob Nruab Xyoo
Mas Tais 25: 1-13
“Nraug vauv los txog lawm! Nej tawm los txais nws!”
Nyob zoo,…
Kwv tij zoo nyiam sawv daws, Mas Tais Ntawv Moo Zoo hnub hais txog zaj paj lug
hais txog kaum leej niam txais ntsuab. Hauv zaj paj lug no, muaj ntau lub cim peb
yuav tsum to taub kom zoo. Ces, peb yuav nkag siab lub ntsiab hauv Tswv Ntuj cov
lus kom meej.
Tus nraug vauv hauv zaj paj lug txhais tias Huab Tais Leej Pleev. Lub caij uas
tus nraug vauv yuav los txog muaj lub ntsiab txog hnub kawg, yog lub caij uas Huab
Tais Yes Xus yuav rov qab los zaum ob.
Kaum leej ntxhais muaj lub ntsiab lus hais txog cov ntseeg sawv daws, cov
tau txais lub cim ntxuav thiab txoj kev ntseeg hauv lub Koom Txoos. Sawv daws
raug caw kom tuaj noj tshoob. Sawv daws raug caw kom tos tus nraug vauv ua ke.
Tswv Ntuj caw peb sawv daws kom nrog Tswv Ntuj nyob hauv Ntuj lub Ceeb Tsheej.
Cov ntseeg sawv daws tab tom tos Huab Tais Yes Xus rov qab los zaum ob ib yam li
tos tus nraug vauv.
Lub teeb txhais tias peb txoj kev ntseeg. Peb txhua txhia leej muaj ib lub teeb. Koj
muaj ib lub teeb, kuv kuj muaj ib lub teeb. Peb yuav khaws cia lub teeb no kom zoo.
Peb yuav tsum saib xyuas lub teeb los txoj kev ntseeg no kom nruaj nreb. Txhob tso
kom peb lub teeb tuag os.
Roj muaj lub ntsiab tias kev tig rov qab los yuav lub siab tshiab los conversion los
กลับใจ. Lub neej hauv txoj kev ntseeg tsis yog tias yus txais lub Cim Ntxuav tas
lawm, ces, tiav lawm, yus tsis ua dab tsi lawm. Tsis yog. Lub neej hauv txoj kev
ntseeg mas, niaj hnub yus yuav tsum tig los yuav lub siab tshiab, yus yuav tsum taug
hauv txoj kev ntseeg. Yog yus tsis tig los yuav lub siab tshiab, tsis taug hauv Tswv
Ntuj txoj kev kuj zoo li yus tsis ntim roj rau hauv lub teeb, yus lub teeb ntawm kev
ntseeg yeej yuav tuag tas.
Cov kwv tij hmoob, Huab Tais Yes Xus zaj paj lug hnub no qhia kom peb txawj npaj
yus tus kheej kom txhij, npaj yus lub neej kom txhij. Vim rau qhov hais tias peb tsis
paub lub caij ntawd yuav los txog thaum twg. Peb tsis paub tias pe blub caij kawg
yuav los txog thaum twg. Vim li ntawd, peb yuav npaj yus tus kheej kom txhij. Tig los
yuav lub siab tshiab, zam txim rau luag tej rau tus ua txhaum rau peb, peb thiaj muaj
kev thaj yeeb hauv lub siab.
Peb yuav tsum ua neej zoo li cov tsib leej ntxhais xyuam xim uas lawv nqa teeb thiab
ntim roj rau hauv hwj nrog kom txhij kom txaus tos tus nraug vauv. Peb yuav tsum
npaj roj hauj peb lub neej kom txaus, peb yeej yuav tsum tig los nrhiav Tswv Ntuj tsis
tu ncua.
Kwv tij sawv daws, peb yuav tsum xaiv peb yuav ua neej zoo li cov tsib leeg ruam
los zoo li cov tsib leeg xyuam xim. Huab Tais Tswv Ntuj nyiam peb, Tswv Ntuj khuv
leej peb sawv daws. Tswv Ntuj pub kev ywj pheej rau peb kom xaiv txoj kev ua neej
raws li peb lub siab xav. Tab sis mas, peb kuj yuav tsum lub txiv los qhov yuav tau
txais thiab os. Thov Tswv Ntuj foom hmoob zoo rau peb sawv daws txhua leej txhua
tus.