Hnub Chiv Tim 12 Lub 6 Hlis 2022 (Sunday Homily)

Hnub Chiv Tim 12 lub 6 Hlis 2022

Lub Hwm Huab Tais Peb Leeg
Zam 16: 12-15
“tas ib puas tsav yam uas yog Leej Txiv tug, mas kuj yog kuv tug huv tib si.
Vim li ntawd kuv thiaj hais rau nej tias: Leej Nplij Neeg yuav coj yam uas
yog kuv tug tuaj qhia rau nej.”

Hnub chiv no yog hnub hwm peb leeg huab tais. Cov lus uas Zam hais tias “tas ib puas
tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj
hais rau nej tias: Leej Nplij Neeg yuav coj yam uas yog kuv tug tuaj qhia rau nej.” Qhov
no yog qhov tseeb hais txog Peb Leeg Huab Tais uas Yes Xus qhia cov thwj tim. Leej
Txiv, Leej Tub thiab Leej Ntuj Plig ua hauj lwm ua ke. Nco tsoov tias muaj Tswv Ntuj ib
Leeg xwb. Peb hais txog peb leej huab tais, tsis txhias tias muaj Tswv Ntuj peb leeg.
Tab sis hauv ib Leeg Tswv Ntuj muaj peb leeg huab Tais uas Yog Huab Tais Leej Txiv
muaj hwj huam tas nrho, yog tus tsim ntuj tsim teb, thiab Huab Tais Leeg Tub twm zeej,
yog peb tus Huab Tais Yes Xus. Thiab Huab Tais Leej Ntuj Plig Ntshiab tus ua kom
Leej Tub xeeb los ua neeg nyob ntiaj teb no. Thiab Nws tshoj tib neeg siab kom tib
neeg taug Tswv Ntuj txoj kev hauv lub Koom Txoos Ntshiab. Yes Xus hias tias Leej Ntuj
Plig yuav nqes los nrog cov neeg ntseeg nyob, Yes Xus kuj yuav nrog peb sawv daws
nyob mus li mus txog hnub ntiaj teb kawg.
Hais txog Peb Leeg Huab Tais tsis yooj yim kiag li. Peb paub tias peb paub txog Tswv
Ntuj tsis tag nrho, thaum peb ua li ntawd tau, peb kuj yog Tswv Ntuj lawm, puag yog? Li
cas los xij, kev txuj uas peb paub txog Tswv Ntuj kuj txaus lawm, txaum ua kom peb
ntseeg tias Tswv Ntuj hlub peb sawv daws txhua leeg txhua lus.
Nco tsoov tias ua ntej teev Ntuj los thov Ntuj los Ua thaj txi Ntuj, peb ua ntoo cuam lub
cim thiab hais tias “Hu txog Leej Txiv thiab Leej Tub thiab Leej Ntuj Plig lub npe. Ua li.”
Qhov tseeb yog tias peb hu txog Huab Tais Peb Leeg tas li, thaum peb ua ntoo cuam
lub cim. Ua li ntawd, kuv caw peb sawv daws nquag hu txog Huab Tais Peb Leeg, muaj
kev kub siab teev Ntuj. Tsis nyuaj os! Tsuas ua li no xwb “hu txog Leej Txiv thiab Leej
Tub thiab Leej Ntuj Plig lub npe. Ua li.”
Ua ntej peb xaus kev nthuav ntawv Moo Zoo hnub no, muaj ib zaj teev Ntuj hu tias “Zaj
Hwm Peb Leeg Huab Tais” kuv thov caw nej sawv daws teev Ntuj ua ke, “Huab Tais
Leej Txiv, Huab Tais Leej Tub, Huab Tais Leej Ntuj Plig, muaj koob meej nto moo lug,
lub zim txwv no mus txog fab lwm txheej, xws li txheej laus thaud los, ua li.”
Nyob zoo sawv daws!