Hnub Chiv Tim 15 Lub 10 Hli 2023 (Sunday Homily)

Hnub Chiv Tim 15 Lub 10 Hlis 2023

Lub caij Nyob Nruab Xyoo

Mas Tais 22:1-14

“Kuv twb npaj kuv rooj qav tiav tas, txhua yam npaj txhij tas. Nej kav tsij tuaj nrog noj tshoob!”Nyob zoo…

Kwv tij zoo nyiam sawv daws, lub Moo Zoo hnub no, Yes Xus hais zaj paj lug txog lub ntees tshoob. Lub ntees tshoob yog Ntuj lub Ceeb Tsheej. Tswv Ntuj yog zoo li tus vaj hauv zaj paj lug. Tswv Ntuj xa cov tub txib los yog cov yaj saub mus nqua hu neeg tuaj noj tshoob. Cov tub txib mus caw cov neeg tuaj hauv lub ntees tshoob. Tswv Ntuj xa cov tub txib mus caw sawv daws kom tuaj paub Tswv Ntuj.

Hauv zaj paj lug no peb pom dab tsi?

Yam tim 1 Ntuj lub Ceeb Tsheej qhib rau sawv daws. Tsis hais cov His Xas Lais los cov Yus Das, tsis hais cov kws Ntawv Ntshiab, cov leej choj, cov Asia, America, Europe los lwm haiv neeg, Tswv Ntuj qhib Ntuj lub Ceeb Tsheej qhov rooj rau sawv daws, txhua leej txhua tus. Tsis hais cov nplua nug los cov pluag txom nyem, tsis hais cov noj qab nyob zoo los cov muaj mob muaj nkeeg, tsis hais cov siab zoo cov ncaj ncees los cov txhaum cov tsis dawb tsis huv, Tswv Ntuj yeej caw sawv daws tuaj noj tshoob hauv Ntuj lub Ceeb Tsheej thiab. 

Yam tim 2 Tswv Ntuj siab zoo. Txawm tias cov raug caw lawv tsis xav tuaj, Tswv Ntuj kuj rov xa dua ib pab tub txib mus caw txhua leej txhua tus uas nyob tom tej ncauj ke. Cov tub txib mus txhua txoj kev, lawv sau tas txhua leej txhua tus uas lawv ntsib, cov phem cov zoo tuaj huv tib si.  Peb pom tias Huab Tais Tswv Ntuj siab zoo, Tswv Ntuj txais tib neeg txhua leej txhua tus hauv Ntuj lub Ceeb Tsheej. 

Yam tim 3 Tswv Ntuj yog tus ncaj ncees. Tswv Ntuj siab zoo thiab ncaj ncees. Sawv daws raug caw hauv lub tsev noj tshoob los Ntuj lub Ceeb Tsheej, tab sis tsis yog txhua leej txhua tus yuav nyob peb Ntuj lub Ceeb Tsheej mus tas ib txhia ib txhis. Qees leej tsim nyog nyob pem Ntuj lub Ceeb Tsheej mus tas ib txhia ib txhis. Qee leej tsis tsim nyog nyob hauv Ntuj lub Ceeb Tsheej, lawv yuav raug muab pov rau nraum zoov. Kwv tij sawv daws, Tswv Ntuj yog tus ncaj ncees, nws yuav txiav txim tib neeg raws li yam lawv ua. Yog peb ua neej zoo, ua neej hauv txoj kev nyiam kev hlub, kev zoo, Tswv Ntuj kuj yuav txiav txim raws li ntawd. Yog peb ua neej tsis dawb tsis huv, ua neej phem, Tswv Ntuj kuj yuav txiav txim raws li qhov peb ua thiab. 

Kwv tij hmoob sawv daws, Tswv Ntuj hais tias “kuv twb npaj kuv rooj qav tiav tas, kuv tej heev nyuj thiab cov tsiaj rog puav leej tua tas lawm. Txhua yam npaj txhij tas. Nej kav tsij tuaj nrog noj tshoob!” Ntawm peb maj kwv tij, peb puas npaj peb tus kheej kom txhij tuaj nrog Tswv Ntuj noj tshoob? Peb uas npaj peb tus kheej kom txhij tuaj paub Tswv Ntuj thiab ua raws li Tswv Ntuj lo lus qhia? Hauv zaj paj lug peb hnov hnub no, peb xav tias peb yog leej twg? Peb puas yog cov raug caw tab sis tsis xav tuaj los cov tsis quav ntsej, los cov nyias mus nyias, ib tug mus tom teb, ib tug mus ua luam, tsis quav ntsej txais Tswv Ntuj lo lus caw, los cov tseem nthos nkaus cov tub txib ntes, hiam lawv, muab lawv tua pov tseg los cov tsis hnav tsoos noj tshoob, los cov zoo siab txais Tswv Ntuj caw lawv hauv lub ntees tshoob? Peb yog leej twg hauv zaj paj lug no? 

Thov kom peb sawv daws xav tswv yim txog Tswv Ntuj lo lus hnub chiv no kom zoo mog thiab teev Ntuj, thov Ntuj pab peb kom tsim nyog mus hauv Ntuj lub Ceeb Tsheej. Thov Ntuj kom pab peb ua lub neej zoo raws li Tswv Ntuj lub siab nyiam. Thov Tswv Ntuj foom hmoov zoo rau peb sawv daws txhua leej txhua tus.