Hnub Chiv Tim 16 Lub 4 Hlis 2023 (Sunday Homily)

Hnub Chiv Tim 16 Lub 4 Hlis Ntuj 2023
Lub Caij Hla
Zam 20:19-31 
“Peb pom Huab Tais lawm!” 
Nyob zoo…
Kwv tij sawv daws, hauv Zam Ntawv Moo Zoo hnub no peb yuav pom tias qhov uas Zam xav qhia kom zeem tseeb yog “kev ntseeg” txog Yes Xus, peb tus Huab Tais. Tom qab Yes Xus sawv rov los, cov thwj tim tseem muaj kev tsis ntseeg vim rau qhov hais tias lawv muaj kev ntshai, lawv muaj kev kub ntxhov, muaj kev ntxhov siab, kev cia siab plog mus lawm; lawv lub neej tsis muaj kev thaj yeeb kiag li. Ces thaum Huab Tais Yes Xus los sawv hauv nruab nrab thiab foom hmoov zoo rau lawv “Nej nyob kaj lug.” Cov thwj tim pom Huab Tais, lawv zoo siab kawg! Qhov tseeb uas yus pom Huab Tais Yes Xus lawm yog kev kaj siab lug, yog kev thaj yeeb, yog kev cia siab loj lawm. Lub qhov rooj uas kaw lawm thaiv tsis tau Tswv Ntuj, los thaiv Yes Xus kom los ntawm pe blub siab tsis tau. Qhov chaw uas muaj kev ntshai, muaj kev tsaus ntuj nti tiv thaiv tsis tau Tswv Ntuj. Lub siab uas kaw lawm kuj thaiv tsis tau Tswv Ntuj thiab. 
Tsis tas li ntawd, thaum Huab Tais Yes Xus foom hmoov zoo rau cov thwj tim tas lawm, nws tshuab  pa rau lawv, nws pub Leej Ntuj Plig Ntshiab rau lawv. “Nej txais Leej Ntuj Plig Ntshiab.” Huab Tais Yes Xus muab txoj hauj lwm loj rau cov thwj tim. Nws hais tias “nej nyob kaj lug! Kuv xa nej mus xws li Leej Txiv xa kuv tuaj.” Yes Xus cov thwj tim txhua leej txhua tus yuav tsum txais txoj hauj lwm no los ua kom tiav. Peb sawv daws kuj yog Yes Xus cov thwj tim thiab, ua li ntawd, peb kuj yuav tsum ua hauj lwm no kom tiav thiab. Peb yuav tsum tshaj tawm raws li cov thwj tim tshaj tias “Peb pom Huab Tais lawm!” thaum peb Huab Tais Yes Xus lawm, peb nyob twj ywm tsis tau, yuav tsum mus ua tim khawv txog Huab Tais uas peb pom thiab, yuav tsum mus caw cov uas tsis tau paub tsis tau pom los pom los ntseeg thiab.
Tos Mas yog piv txwv ntawm cov tsis ntseeg, cov ntseeg nyuaj nyuaj. Yog nws tus kheej tsis pom Huab Tais, tsis pom lub qhov txhab ntsia hlau nyob hauv nws ob txhais tes kuj tsis ntseeg. Tab sis mas, yim hnub tom qab, thaum Yes Xus tawm los sawv hauv nruab nrab ib zaug dua, Tos Mas tshaj tawm nrov nrov tias “kuv tus Huab Tais, kuv tus Tswv Ntuj,” tam sim no, nws ntseeg!
Kwv tij sawv daws, peb lub neej hauv txoj kev ntseeg kuj yog zoo li no: qees leej tsis pom kuj tsis ntseeg, qees leej txawm tsis pom tab sis lawv hnov ces lawv ntseeg kuj yog ib qho zoo tshaj. Huab Tais Yes Xus hais tias “Vim koj pom kuv, mas koj thiaj ntseeg. Cov uas tsis tau pom tab sis lawv ntseeg, mas lawv txoj hmoov zoo.” Los saib ntawm yus tus kheej, peb yog ib tug neeg ntseeg zoo li cas? Thov yus nug yus tus kheej thiab.
Lub caij hla yog lub caij ntawm kev zoo siab, kev muaj txoj sia tshiab hauv Tswv Ntuj. Peb tuag ntawm kev txhaum, kev tsis zoo lawm, tam sim no, peb sawv rov los ntawm kev tuag, ntawm kev txhaum lawm. Nyem no yav tom ntej, peb yuav ua neej nyob hauv txoj kev ntseeg, peb yuav los nyob ze Tswv Ntuj vim tias thaum peb paub Tswv Ntuj, peb txais Tswv Ntuj lub txiaj ntsim lawm: “Nej nyob kaj lug!”