Hnub Chiv Tim 18 Lub 2 Hlis 2024 (Sunday Homily)

Hnub Chiv tim 18 Lub 2 Hlis Ntuj 2024

Lub lis piam tim 1 hauv lub caij Plaub Caug

Mas Kos 1:12-15

“Tswv Ntuj lub Ceeb Tsheej los txog ze lawm: nej hloov siab, nej ntseeg txog lub Moo Zoo mog.”

Nyob zoo…

Hnub no yog thawj hnub chiv hauv lub caij Plaub Caug, Hauv Ntawv Moo Zoo hnub no peb hnov tias ua ntej Huab Tais Yes Xus yuav mus tshaj Ntuj Lus, nws mus rau hauv teb chaws suab puam, nyob ntawd nws raug dab phem ntxias. Nyob ntawm teb chaws suab puam, Huab Tais Yes Xus ua dab tsi?
 Qhov tiag mas, Huab Tais Yes Xus yoo mov thiab teev Ntuj. Mas Kos hais li no xwb, nws tsis piav dab tsi ntxiv mus. Tab sis mas, hauv Mas Tais Ntawv Moo Zoo, Mas Tais piav ntxiv tias Yes Xus raug dab phem ntxiav zoo li cas.

Kev ntxias yam tim 1: nws raug ntxias kom hais kom cov pob zeb txia ua mov vim Yes Xus tshaib plab kawg. Qhov no yog kev ntxias ntawm kev qia dub, yus pom yus tus kheej tib leeg xwb, yus tsis pom luag tej. Kev ntxias yam tim 2: nws raug ntxias kom dhia lawm puag hauv, ces Ntuj cov tshiab yuav nqa nws nyob hauv lawv txhais tes. Qhov no yog kev siv hwj chim tsis raug, tsis ncaj ncees. Kev ntxias yam tim 3:  nws raug ntxias kom txhos caug pe tus dab phem, mas nws yuav muab cov ceeb tsheej muaj koob meej nyob ntiaj teb tas huv si rau Yes Xus. Qhov no yog kev ntxias kom muaj tej hwj chim thiab muaj koob meej muaj suab muaj npe, muaj nyiaj muaj txiag nyob ntiaj teb no. 

Yes Xus yoo mov thiab teev Ntuj tau plaub caug hnub plaub caug hmo. Nws yeej tau kev ntxias. Tswv Ntuj kheev kom Yes Xus raug dab phem ntxias, vim Yes Xus yog tus piv txwv uas peb yuav ua raws li nws: niaj hnub dab phem ntxias peb; phim Yes Xus yuav qhia peb tias thaum peb raug dab phem ntxias mas peb yuav ua zoo li cas. Thaum dab phem ntxias peb, mas peb yuav ceev faj: ntau zaus nws tsis ncaj qha ntxias kom peb ua phem: ntau zaus nws cev tej yam zoo nyob sab nraud rau peb ua, kom peb txhob ua txoj hauj lwm tseem ceeb uas Tswv NTuj kom peb ua, zoo li nws ntxias Yes Xus. 

Lub caij plaub caug no, peb npaj peb tus kheej zoo li cas? Peb cov ntseeg sawv daws yuav tsum ua raws li Yes Xus, peb tus Huab Tais, tau qhia peb, yog qhov tias peb yuav tsum yoo mov thiab teev Ntuj. Kwv tij sawv daws, peb paub tias hauv Lub Koom Txoos Catholic ua ntej peb yuav ua dab tsi los yog ua hauj lwm dab tsi tseem ceeb tshaj, peb yuav siv sij hawm sau siab, peb yuav muaj sij hawm nyob twj ywm sau siab npaj siab, muaj kev cuam tshuam. Ua ntej yuav txais lub cim tiag tes, cov leej tij los deacon kuj yuav tsum sau siab. Ua ntej yuav txais lub cim ua Tswv Qhia los Vaj Qhia kuj yuav tsum muaj kev sau siab. Ua ntej yuav hais cog lus ua Leej Phauj los Leej Tij kuj yuav tsum muaj kev sau siab. Ua li ntawd, ua ntej mus txog lub caij Hla, peb kuj yuav tsum siv sij hawm tig los soj ntsuam txog yus tus kheej. Yus ua neej zoo li cas, yus ua txhaum rau luag tej zoo li cas, yus ua txhaum rau yus tus kheej zoo li cas. Yus tseem muaj txhaum qhov twg, yus tseem ua txhaum li cas, yus kuj siv sij hawm npaj siab thiab txiav txim siab tias yus yuav dab tsi kom zoo tuaj. Yus yuav tso txoj kev txhaum pov tseg puas tau? Yus yuav tso qhov txhaum pov tseg puas tau? Qhov tseem ceeb tshaj plaws hauv lub caij Plaub Caug, tsis yog kev yoo mov, los kev yeem cia lub cev raug txom nyem, tab sis yog kev npaj yus lub siab lub ntsws, hloov lub tswv yim, hloov yus lub siab lub ntsws kom taug kev hauv txoj kev ncaj ncees los yog hauv Tswv Ntuj txoj kev. Yam li Huab Tais Yes Xus ntuas peb hnub no, thaum nws tawm mus ntawm teb chaws suab puam lawm, nws tshaj lub Moo Zoo qhia txog Tswv Ntuj, “txog lub caij teem lawm, Tswv Ntuj lub Ceeb Tsheej los txog ze lawm: nej hloov siab, nej ntseeg txog lub Moo Zoo mog.” Hnub no mas, peb hnov lub Moo Zoo lawm, peb tau txais lub Moo Zoo lawm, thov peb cov neeg ntseeg sawv daws siv lub sij hawm no hauv lub caij Plaub Caug npaj siab npaj ntsws kom zoo mog!