Hnub Chiv Tim 19 Lub 11 Hlis 2023 (Sunday Homily)

Hnub Chiv tim 19 Lub 11 Hlis Ntuj 2023

Lub lis piam tim 33 hauv lub caij nyob Nruab Xyoo
Mas Tais 25: 14-30

“Zoo kawg, tub txib siab zoo siab ncaj. Thaum koj saib tej yam tsawg li no, koj ua ncaj. Kuv yuav tsa koj saib ntau yam. Koj los nyob hauv koj tus haub tais txoj kev zoo siab mog!”

Nyob zoo,…

Kwv tij hmoob sawv daws, hauv Ntawv Moo Zoo hnub no, Huab Tais Yes Xus qhia peb txog cov nras nyiaj. Peb sawv daws yog cov nras nyiaj los tus tub txib. Tswv Ntuj yog tus tswv hauv zaj paj lug hnub no. Thaum peb mloog Tswv Ntuj cov lus hauv hnub no tas lawm, peb xav li cas os? 
Peb puas ntseeg tias Tswv Ntuj muab nras nyiaj los talent rau peb ib leeg ib leeg txhua txhua tus?
Yog mas, thaum peb yug los Tswv Ntuj muab nras nyiaj rau peb lawm. Cov nras nyiaj no yog peb lub peev xwm los ability lo lus thaib ความสามารถ tsis yog nyiaj txiag ib yam li zaj paj lug hais. Peb sawv daws muaj txawv lub peev xwm. Kuv txawj ntaus guitar, koj txawj hu nkauj zoo zoo heev, tus no txawj ua zaub ua mov qab kawg, tus no txawj ua ub ua no. txhua leej txhua tus muaj txawv peev xwm. Vim li ntawd, yus yuav tsum sib pab sib pawg, siv lub peev xwm lub talent tsob hwb luag tej. 
Huab Tais Yes Xus hais zaj paj lug hnub no kuj xav qhia peb kom paub tias cov nras nyiaj los talent uas Tswv Ntuj muab rau peb, peb yuav tsum siv kom muaj qab hau rau yus tus kheej thiab luag tej. Yus yuav tsum siv cov nras nyiaj kom muaj qab hau tshaj plaws rau Tswv Ntuj thiab cov kwv tij sawv daws. Yus yuav tsum siv cov nras nyiaj tsob hwb lwm tus. Yog peb muaj peev xwm ua tau ntau ntau yam, tab sis, peb tub nkeeg tsis ua, peb tsis siv cov nras nyiaj Tswv Ntuj muab rau peb kom muaj qab hau dab tsi, muaj ib hnub mas, Tswv Ntuj yuav hais rau peb tias “rho nras nyiaj ntawm nws, ces muab rau tus uas muaj kaum nras lawm.”
Cov kwv tij hmoob sawv daws, peb yog cov neeg ntseeg, mas Tswv Ntuj yeej muab txoj hauj lwm rau peb thiab Tswv Ntuj yeej pub nras nyiaj rau peb kom tsim nyog ntawm peb txoj hauj lwm, kom peb ua Tswv Ntuj txoj hauj lwm kom tawg paj txi txiv muaj qab hauj tshaj plaws rau cov npawg ntseeg sawv daws, rau cov nyob ib puag ncig. Txawm tias muaj kev txom txom nyem, muaj kev nyiaj siab, ua hauj lwm sab sab mas, kuj thov kom peb txhob tu siab, txhob maj qaug zog, xav kom meej hauv yus lub siab tias kuv ua txoj hauj lwm no rau Tswv Ntuj, kuv cev kev txom nyem, kev nyuaj siab, kev khwv tag nrho rau Tswv Ntuj. Thov kom Tswv Ntuj muab zog rau kuv kom kuv ua Tswv Ntuj txoj hauj lwm ntxiv mus tau, kom kuv pab lwm tus, tsob hwb lwm tus tau. Kuv ua cov no kuj vim tias kuv nyiam Tswv Ntuj thiab nyiam cov kwv tij. Ces thaum kawg mas, Tswv Ntuj yuav hais rau koj tias: “Zoo kawg, tub txib siab zoo siab ncaj. Thaum koj saib tej yam tsawg li no, koj ua ncaj. Kuv yuav tsa koj saib ntau yam. Koj los nyob hauv koj tus haub tais txoj kev zoo siab mog!”
Kwv tij zoo, nyiam sawv daws, cov ua txoj hauj lwm tsob hwb lwm tus, nej ua zoo kawg li lawm, nej siv nras nyiaj kom tawg paj txi txiv ntau lawm, thov ua nej tsaug. Thov kom nej ua ntxiv mus, Tsob hwb Tswv Ntuj ntxiv mus. Nej ua zoo tshaj li lawm. 
Ntawm cov tseem tsis tau siv yus nras nyiaj yus lub peev xwm kom muaj qab hau, thov nej qhib siab mloog Tswv Ntuj lo lus hnub no thiab siv nej nras nyiaj los talent kom tawg paj txi txiv mog.