Hnub Chiv Tim 19 Lub 3 Hlis 2023 (Sunday Homily)

Hnub Chiv Tim 19 Lub 3 Hlis 2023
Lub caij Plaub Caug
Zam 9:1, 6-9, 13-17, 34-38

“Huab Tais, kuv ntseeg”
Nyob zoo…
 Hnub no yog hnub chiv hauv lub lis piam plaub hauv lub Caij Plaub Caug lawm. Hnub no Huab Tais Yes Xus tseem caw peb sawv daws saib ntawm kev dig muag ntawm tib neeg: peb sawv daws muaj kev dig muag. Kev dig muag tsis txhais tias kev dig muag ntawm qhov muag xwb, tab sis mas tseem txhais tias lub siab dig, lub tswv yim dig thiab. 
Hauv Ntawv Moo Zoo, Huab Tais Yes Xus kho tus dig muag nruab thiab. Cov Isarael ntseeg tias kev dig muag nruab thiab yog kev txhaum. Nws niam nws txiv los leej twg hauv tsev neeg yuav tsum ua txhaum, tus dig muag thiaj dig muag nruab thiab los. Vim li ntawd, cov thwj tim thiaj nug Yes Xus tias: “Leej twg ua txhaum: Puas yog nws los yog nws niam nws txiv ua txhaum, nws thiaj dig muag txij nruab thiab los?” Yes Xus teb tias “tsis yog nws txhaum, thiab kuj tsis yog nws niam nws txiv txhaum. Tab sis nws yug los dig muag kom xwv Tswv Ntuj cov hauj lwm tshwm hauv nws tuaj rau luag pom.” Qhov pom kev yog Huab Tais Yes Xus, qhov pom kev yog Tswv Ntuj. Tsis hais leej twg nhriav nws thiab ntsib nws, kuj yuav pom kev.
Tej zaus kev dig muag ntawm peb, peb kho tsis tau, yuav tsum ntseeg, yuav tsum muaj kev ntseeg thiaj kho tau. Peb yuav tsum tshaj tias “Huab Tais, kuv ntseeg.” Kev dig muag ntawm peb thiaj kho tau. Tus dig muag nruab thiab pab nws tus kheej tsis tau, tsis muaj leej twg pab nws tau thiab. Tab sis Huab Tais Yes Xus pab nws tau vim rau qhov hais tias nws ntseeg Huab Tais Yes Xus lo lus hais kom nws mus ntxuav nws qhov muag tom lub pas dej. Yog nws tsis ntseeg Yes Xus, nws kuj tsis tau pom kev. 
Ntawm peb mas kwv tij sawv daws, peb puas xav tias qhov tiag mas peb kuj yog ib tug neeg dig muag thiab? Tej zaus, peb dig muag, yus tsis pom yus tus kheej thiab yus tsis pom luag tej. Hais txog kev dig muag, tsis yog qhov muag xwb. Txawm muaj qhov muag zoo, tab sis peb lub siab dig lawm, peb kuj yog neeg dig muag thiab. Ntawm peb cov neeg ntseeg hnub no, kev dig muag uas kuv hais txog yog kev dig muag ntawm peb lub siab lub ntsws uas rau peb tsis pom Tswv Ntuj, uas rau peb tsis pom qhov zoo uas luag tej rau peb, kev dig muag ua rau peb tsis pom yus kev txhaum kev ua tsis zoo tab sis pom luag tej li, yog kev dig muag ua rau peb tsis pom Huab Tais Yes Xus nyob nruab nrab peb cov kwv cov tij, kev dig muag ua rau peb tsis pom ib yam li Tswv Ntuj pom. Kev dig muag ua rau peb tsis pom txoj kev mus cuag Tswv Ntuj. Kev dig muag no muaj xwm txheej dua qhov muag dig muag.
Tshuaj zoo uas yuav kho kev dig muag no tau kuj yog kev ntseeg txog Huab Tais Yes Xus. Ntseeg thiab ua raws li nws qhia, ua raws li nws hais. 
Thov kom Huab Tais Yes Xus pab peb kom yeej yus kev dig muag kom pom kev, kom pom tias Huab Tais Yes Xus yog qhov pom kev loj tshaj plaws rau peb lub neej.