Hnub Chiv Tim 2 Lub 4 Hlis 2023 (Sunday Homily)

ZAJ NYEEM HNUB TIM 2 LUB 4 HLIS, HNUB CHIV NQAUM NPLOOJ
COV LUS NYOB HAUV MAS TAIS NTAWV MOO ZOO (MT 21: 1-11)

Hnub Chiv Tim 2 Lub 4 Hlis Ntuj 2022
Lub Caij Plaub Caug Hnub Chiv Nquam Nplooj
Mas Tais. 27:11-54 

“Tus no yog Yes Xus, cov Yus Das tus vaj”
Nyob zoo…
Hnub chiv no yog Hnub Chiv nquam Nplooj. Zaj Nyeem Ntawv Moo Zoo hnub no ntev tshaj li. Zaj nyeem piav Yes Xus txoj kev tuag.
Mas Tais Zaj 21: 9 qhia tias “tas tsoom neeg uas mus ua Yes Xus ntej thiab lawv Yes Xus qab qw tias ‘Das Vis Leej Tub, thov koj cawm peb. Tus uas Huab Tais xa tuaj, nto  koob meej, tus nyob suam cov txheej ntuj siab, thov koj cawm peb!’” tas tsoom sid txais Yes Xus xws li Leej Pleev.
Nquam nplooj muaj lub ntsiab txog kev muaj yeej ntawm kev txhaum, kev muaj yeej ntawm kev tuag. Tus maum luj muaj lub ntsiab txog kev tsob hwb luag tej, txoj kev txom nyem, thiab kev txo hwj chim. Txhua yam no hais txog Huab Tais Yes Xus yog tus Vaj, Haub Tais Yes Yus yog tus Pleev, nws yog tus tuaj cawm neeg ntawm kev txhaum thiab tsaus ntuj nti. Nws yeej kev txhaum, kev tuag. Nws muab kev muaj yeej rau cov neeg uas ntseeg nws thiab ua raws li nws.
‘Huab Tais Yes Xus txoj kev txom nyem’ lus English hu tias “the Passion of Christ” yog Huab Tais Yes Xus kawg hauj lwm ua ntej nws yuav sawv rov los muaj txoj sia tshiab. Nws txoj kev txom nyem qhia kom tseeb txog Tswv Ntuj txoj kev nyiam kev hlub tib neeg. Qees leej pom txoj kev txom nyem no zoo li yam phem tshaj plaws. Kev tuag saum ntoo cuam yog kev phem tshaj plaws tab sis mas Huab Tais Yes Xus muab lub ntsiab tshiab rau tus Ntoo Cuam. Huab Tais Yes Xus txoj kev txom nyem tsis yog yam uas cov ntseeg yuav ntshai. Tsis yog! Tsis yog tiag tiag! Yes Xus kev txom nyem yog kev nyiam kev hlub luag tej tshaj uas rau yus muab yus tus kheej rau luag tej kev noj qab nyob zoo, muab yus tus kheej rau luag tej kev cawm, muab yus tus kheej rau luag tej muaj txoj sia nyob mus li. 
Kwv tij hmoob sawv daws, huav peb lub neej kuj ib yam li thiab. Peb sawv daws yuav tsum muaj kev txom nyem hauv peb lub neej. Tsis muaj leej twg tsis muaj kev txom nyem. Tab sis peb cov ntseeg muab kev txom nyem no nrog Huab Tais Yes Xus txoj kev txom nyem koom siab koom ntsws ua kom kev txom nyem muaj lub ntsiab tseem ceeb hauv yus lub neej. Yus ris tau kev txom nyem vim yus hlub lwm tus, vim yus vam tias lwm tus yuav muaj kev vam meej, yuav muaj noj qab nyob zoo, yuav ua lub neej zoo. Lwm tus uas kuv hais txog yog yus cov me yub me nyuam, yus niam thiab txiv, thiab yus kwv tij neeg tsa txhua leej txhua tus. Qhov no yog kev txom nyem yus ua tau zoo li Huab Tais Yes Xus ua rau peb sawv daws txhua leej txhua tus. Peb yuav tsum paub tias kev txom nyem hauv yus lub neej yog yus tus ntoo cuam uas yus yuav tsum kwv mus. Kev txom nyem hauv yus lub neej yog yus tus ntoo cuam uas yus nrog Yes Xus kwv mus kom txog lub hom phiaj, lub hom phiaj ntawd yog Tswv Ntuj lub Ceeb Tsheej.
Vim li ntawd, thov txhawb nqa lub zog rau peb cov ntseeg txog Yes Xus sawv daws txhua leej txhua tus kom muaj kev ntseeg txog Tswv Ntuj tsis tu ncua.