Hnub Chiv Tim 22 Lub 10 Hli 2023 (Sunday Homily)

Hnub Chiv Tim 22 Lub 10 Hlis 2023

Lub lis piam tim 29

Lub caij Nyob Nruab Xyoo

Mas Tais 28:16-20

“Nej mus, nej ua kom tas ib tsoom haiv neeg los ua kuv thwj tim!”

Nyob zoo…

Kwv tij hmoob sawv daws, hnub no yog hnub txoj hauj lwm tshaj Ntuj Lus, lus As Kiv hais tias World Mission Sunday. Vaj Qhia Pius XI tsim hnub no kom sawv daws pab thov Ntuj rau txoj hauj lwm tshaj Ntuj Lus.

Vaj Qhia Francis hais tias Hnub kev ua hauj lwm tshaj Ntuj Lus xyoo no, nws tau xaiv Tswv Ntuj Lo Lus ntawm Lukas Ntawv Moo Zoo hais tias “Lub siab kub lug hauv nrog cev, ob txhais ko taw sawv kev.” Vaj Qhia Francis qhia txog ob tug thwj tim mus Es Mas Ws nkawd ob leej tsis paub yuav ua dab tsi hauv nkawd lub neej, tab sis mas nkawd tau ntsib Huab Tais Yes Xus hauv Ntawv Ntshiab thiab hauv thaj txi Ntuj. Yes Xus tuav lub ncuav mov (nws hais zaj foom hmoov zoo, nws muab lub ncuav mov ntais, nws cev rau nkawd). Ces nkawd qhov muag qhib plho, nkawd zeem tau Yes Xus. 

Kwv tij zoo nyiam sawv daws, peb yog Yes Xus cov thwj tim, peb tau txais lub cim ntxuav, peb tau ntseeg txog Yes Xus, peb sawv daws yeej yog Yes Xus cov thwj tim lawm. Vim li ntawd, kev ua thwj tim ntawm Yes Xus tsis yog yus nyob twj ywm, tsis ua dab tsi xwb. Lo lus “mission” los ntawm lus Latin missio txhais tias “sending” lush moob “xa” “xa mus” “xa kom mus.” Yus tsis nyob twj ywm, Tswv Ntuj xa yus kom ua ib yam dab tsi. Yes Xus muab txoj hauj lwm tseem ceeb tshaj rau yus kom ua yog hias “kev tshaj Ntuj Lus.” Nco ntsoov tias Yes Xus hais tias “Nej mus, nej ua kom tas ib tsoom haiv neeg los ua kuv thwj tim!” 

Kwv tij sawv daws, zoo li ob tug thwj tim mus Es Mas Ws, tej zaus, peb mus yuav kev, peb tsis paub yuav tshaj Ntuj lus zoo li cas, peb tsis paub yuav ua neej zoo li cas. Nco ntsoov tias thaj txi Ntuj thiab Tswv Ntuj lo lus los yog Ntawv Moo Zoo yog peb lub zog, yuav txhawb nqa peb kom kom muaj zog. Ntawv Moo Zoo thiab thaj txi Ntuj yuav qhia peb lub qhov muag kom pom Huab Tais Yes Xus, peb thiaj tsis mus yuav kev lawm.

Niaj hnub nyem no, kev ua hauj lwm tshaj Ntuj lus tsis yog hais tias yus nyias mus nyias khob qhov rooj txhua lub tsev thiab hais txog Yes Xus kom lawv mloog, tsis yog li ntawd kwv tij. Kev ua hauj lwm tshaj Ntuj lus yog kev ua neej raws li Yes Xus qhia, raws li lub Koom Txoos qhia. Yus mus koom thaj txi Ntuj txhua hnub chiv, yus nquag teev Ntuj, mloog Tswv Ntuj Lo Lus, yus mus pab npaj tu lub tsev teev Ntuj, yus yog neeg siab zoo, hlub luag tej, pab luag tej. Qhov no yog txoj hauj lwm tshaj Ntuj lus lawm. Tswv Ntuj lo lus thiab thaj txi Ntuj yog mov pub yus txoj sia. 

Kwv tij hmoob sawv daws, hnub no, vaj qhia Francis thov kom peb cov ntseeg sawv daws thov Ntuj rau txoj hauj lwm ntawm lub Koom Txoo. Peb paub tias txoj hauj lwm tseem ceeb tshaj plaws yog kev nyiam kev hlub hauv lub qab ntuj no. Tab sis mas, ib yam li peb tau paub tau hnov, niaj hnub no tseem muaj kev ua tsov ua rog tsis txawj tas, tseem muaj sib ntaus sib cav sib ceg nruab nrab lwm haiv neeg. Peb thov Tswv Ntuj pab kom muaj kev thaj yeeb hauv niaj teb no, kom muaj kev nyiam kev hlub, kom Tswv Ntuj txoj hauj lwm tawg paj txi txiv mus li. Amen.