Hnub Chiv Tim 22 Lub 5 Hlis 2022 (Sunday Homily)

Hnub Chiv Tim 22 Lub 5 Hlis 2022

Lub Caij Hla 6
Zam Ntawv Moo Zoo 14:23-29
“Kuv tso txoj kev thaj yeeb rau nej, yog kuv txoj kev thaj yeeb, kuv muab pub rau
nej. Kuv tsis pub txoj kev thaj yeeb xws li lub qab ntuj neeg pub.”
Nyob zoo…
Hnub no yog hnub chiv tim 6 hauv lub caij hla lub lis piam yav dhau los, peb tau
hnov Ntawv Moo Zoo qhia txog kev sis nyiam sis hlub, sis nyiam sis hlub xws li
Huab Tais Yes Xus nyiam. Hnub no mas Ntawv Moo Zoo hais txog “txoj kev thaj
yeeb.” Txoj kev thaj yeeb tshwm sim tuaj ntawm kev sis nyiam sis hlub. Yog yus
hlub luag tej, yus tsis xav phem rau lawv, txoj kev thaj yeeb yuav tshwm sim tuaj
hauv yus lub siab. Peb kwv tij hmoob nyiam hais txog txoj kev thaj yeeb, peb paub
zoo lawm kev thaj yeeb yog dab tsi? Hauv Ntawv Moo Zoo hnub no, Huab Tais
Yes Xus qhia kom tseem ceeb tias Tswv Ntuj tsis pub txoj kev thaj yeeb xws li lub
qab ntuj neeg pub. Txoj kev thaj yeeb uas lub qab ntuj neeg pub kuj zoo li qhov
chaws uas tsis muaj kev ua tsov rog, lub neej uas tsis muaj kev txom nyem, lub
neej zoo uas muaj txhua yam yus xav muaj, lub neej npuaj nug, lub neej uas muaj
nyiaj muaj txiag. Lawv xav tias thaum lawv muaj yam no, lawv yuav muaj kev thaj
yeeb, muaj lub neej zoo. Sawv daws ntshaw muaj, sawv daws xav tau! Qhov no
yog lub ntsiab ntawm txoj kev thaj yeeb uas tib neeg muab.
Tab sis mas, Huab Tais Yes Xus hais li cas? “Kuv tsis pub txoj kev thaj yeeb xws
li lub qab ntuj neeg pub.” Huab Tais Yes Xus txoj kev thaj yeeb yuav ua kom peb
“tsis txhob ntxhov siab”, ua kom peb “tsis txhob ntshai.” Nws hais tias “tus nyiam
kuv, khaws kuv cov lus,” ces nej yuav muaj kuv txoj kev thaj yeeb. Txoj kev
ntseeg txog Tswv Ntuj yog qhov uas tseem ceeb tshaj yuav ua rau yus muaj Tswv
Ntuj kev thaj yeeb, tsis yog lub qab ntuj neeg txoj kev thaj yeeb. Nej sim xav, sawv
daws txhua leej txhua tus muaj Huab Tais Yes Xus txoj kev thaj yeeb tau, yog yus
ntseeg thiab ua raws li Tswv Ntuj lo lus. Tab sis mas, sawv daws muaj lub qab ntuj
neeg txoj kev thaj yeeb tsis tau. Vim tias kev txom nyem tsis ploj mus, kev ua rsov
rog tsis ploj mus, tseem nyob txhua tiam neeg os. Huab Tais Tswv Ntuj txoj kev
thaj yeeb thiaj yog qhov tseeb tiag tiag. Thov kom sawv daws ntseeg mog!