Hnub Chiv Tim 23 Lub 10 Hlis 2022 (Sunday Homily)

Hnub Chiv Tim 23 Lub 10 Hlis 2022

Lub caij nyob nruab xyoo
Lus Kas 18:9-14

“Leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa
nws siab.”
Nyob zoo…
Kwv tij Hmoob sawv daws hauv Ntawv Moo Zoo hnub no, Huab Tais Yes Xus hais zaj
paj lug txog ob tug neeg nce mus teev Ntuj, ib tug yog Fas Lis Xais, ib tug yog neeg sau
se. Ob tug no, nkawd hais sib txawv zaj teev Ntuj. Tus Fas Lis Xais zaj teev Ntuj yog
hais tias “Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws.
Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo
li tus sau se ntawd.” Zaj no puas yog zaj teev Ntuj, kwv tij sawv daws nej xav li cas?
Kuv hais tiag tiag zaj no tsis yog zaj teev Ntuj. Zaj no yog kev tu siab los yog ntxub los
kev ntxub ntxaug, kev tsis hwm luag tej. Tswv Ntuj tsis hnov nws cov lus. Tus Fas Lis
Xais hais ntxiv mus tias “Ib lis piam, kuv yoo mov, kuv pub ib feem kaum ntawm tas
txhia yam uas kuv khwv tau.” Zaj no nws tab tom qhuas txog nws tus kheej. Nws tab
tom qhuas txog nws kev ncaj ncees. Nws xav tias nws ua qhov zoo ntau yam, hos nws
hais tsis zoo rau tus sau se tau. Nws tsis lees tias nws kuj yog neeg txhaum thiab.
Thaum peb saib ntawm tus sau se zaj teev Ntuj, peb yuav pom tias nws yog neeg tsis
muab hlob. Nws nyob deb, nws tsis muaj cuab tav tsa muag ntsia saum ntuj. Nws hais
rau Tswv Ntuj luv luv tias “Aub, Tswv Ntuj, thov kij khuv lee kuv, vim kuv yog neeg
txhaum!” Nws lees tias nws yog neeg txhaum, nws tseem ua txhaum, nws thiaj thov
Tswv Ntuj khuv leej nws. Nws tsis qhuas txog qhov zoo nws twb ua los nws tsis hais
txog nws tus kheej. Un ntej Tswv Ntuj, nws tsis cov nyom. Huab Tais Yes Xus hais kom
tseeb tias tus sau se ntshiab kuv lawm, hos tus Fas Lis Xais tsis tau ntshiab huv.
Kwv tij hmoob sawv daws, thaum peb saib peb tus kheej peb ua neej zoo li leej twg
hauv zaj paj lug no? zoo li tus Fas Lis Xais los zoo li tus sau se? peb sib nyom nqes
Tswv Ntuj tsis tau. Aws, kuv ua ntau ntau yam zoo, kuv tsis ua txhaum ib yam li tus no,
tus ntawd, Tswv Ntuj yuav tsum nyiam kuv. Peb hais li ntawd tsis tau. Peb ua qhov zoo
kuj zoo lawm, tab sis txhob saib tsis tau luag tej, txhob ntxub luag tej, txhob hais phem
rau luag tej.
Nco tsoov tias “Leej twg tsa nws siab, Ntuj yuav txo nws qis, hos leej twg txo nws qis,
Ntuj yuav tsa nws siab.”