Hnub Chiv Tim 23 Lub 4 Hlis 2023 (Sunday Homily)

Hnub Chiv Tim 23 Lub 4 Hlis Ntuj 2022

Lub lis piam 3 hauv lub Caij Hla
Lus Kas 24:13-35
“Thaum nws hais lus rau wb tom kev, thiab nws txhais Ntawv rau wb, mas
wb lub siab kub lug hauv nrog cev, puas yog?”
Nyob zoo…
Kwv tij hmoob sawv daws, hnub no yog hnub chiv lub lis piam 3 hauv lub
caij Hla, peb tseem mloog Tswv Ntuj Lo Lus piav txog Huab Tais Yes Xus
tawm los rau cov thwj tim pom. Hauv Ntawv Moo Zoo hnub chiv no, Huab
Tais Yes Xus tawm los nrog ob tug thwj tim mus Es Mas Ws tham.
Ntawm peb mas, ntau ntau zaus, peb hais txog kev sawv rov los, txoj sia
tshiab ntawm Tswv Ntuj, txoj sia tshiab nyob mus li ntawm Tswv Ntuj, peb
puas tau xav nug tias txoj sia ntawm kev sawv rov los, los txoj sia tshiab
ntawm kev sawv rov los yog zoo li cas?
Kuv xav tias Tswv Ntuj Lo Lus hnub no tau ua kom peb to tau tshaj dua
txog txoj sia ntawm kev sawv rov los. Huab Tais Yes Xus tawm los nrog ob
tug thwj tim mus Es Mas Ws tham. Ob tug thwj tim zeem tsis tau nws tias
nws yog Huab Tais Yes Xus. Nkawd tab tom mus tsev. Lawv tso hauj lwm
ntawm Tswv Ntuj pov tseg vim rau qhov hais tias Yes Xus tas sim neeg
lawm. Ntawd txoj kev cia siab thiab txoj kev ntseeg kuj plog mus lawm.
Nkawd tsis muaj kev cia siab lawm. Thaum Yes Xus nrog nkawd sawv kev
thiab txhais Ntawv Ntshiab rau nkawd to taub, nkawd kuj tseem zeem tsis
tau nws. Nkawd zeem tau Yes Xus kuj thaum Huab Tais Yes Xusnrog
nkawd zaum ntawm rooj mov, nws tuav lub ncuav mov, nws hais zaj foom
hmoov zoo, nws muab lub ncuav mov ntais, nws cev rau nkawd. Yam uas
Huab Tais Yes Xus ua rau lawv yog tias “kev ua thaj txi Ntuj.” Lub thaj txi
Ntuj ua rau ob tug thwj tim qhov muag qhib plho, lub thaj txi Ntuj ua rau
nkawd pom thiab nkag siab tej yam uas Yes Xus ua thiab qhia rau nkawd.
Kwv tij sawv daws, kev sawv rov los hauv zaj no, hauv lo lus qhia no yog
“kev zeem tau” kev zeem tau Yes Xus. Ua li cas peb thiaj zeem tau Yes
Xus? Kuv hais rau nej tias tsis yog kev pom Yes Xus lub cev los kev pom
tus neeg Yes Xus los peb pom Yes Xus ntsej muag. Tsis yog! Saib! Ob tug
thwj tim pom Yes Xus, nrog nws tham, tab sis nkawd tseem zeem tsis tau

nws. Peb zeem tau Yes Xus kuj vim tias peb pom tej yam zoo nws qhia
thiab ua rau cov thwj tim thiab rau peb thaum nws tseem nyob hauv ntiaj
teb no xws li kev pab luag tej, kev sis nyiam sis hlub, kev pab cov pluag
txom nyem, kev nyiam Tswv Ntuj thiab nyiam cov nyob ib puag ncig peb.
Ob tug thwj tim zeem tau Yes Xus kuj vim tias Yes Xus tau nws tuav lub
ncuav mov, nws hais zaj foom hmoov zoo, nws muab lub ncuav mov ntais,
nws cev rau cov thwj tim thaum noj rooj qav Hla. Nws hais tias “nej txais,
nej noj, qhov no yog kuv lub cev.” Thiab nws hais ntxiv tias “nej sawv daws
haus vim qhov no yog kuv cov tshav. Nej yuav ua li ntawd kom tau nco
txog kuv.” Nej saib, peb nco tau Yes Xus kuj vim tias peb ua raws li nws
qhia, peb taug kev raws li txoj kev nws tau npaj rau peb, qhia peb kom
raws nws qab.
Kwv tij zoo nyiam sawv daws, kev sawv rov los tshwm sim hauv peb lub
neej txhua txhia hnub, tab sis mas peb yuav pom los tsis pom. Yog peb
muaj qhov muag ntawm kev sawv rov los, qhov muag ntawm kev ntseeg,
peb kuj pom tau. Yog peb tsis muaj kev ntseeg Ntuj, peb kuj pom tsis tau
Yes Xus.
“Thaum Huab Tais Yes Xus hais lus rau wb tom kev, thiab nws txhais
Ntawv rau wb, mas wb lub siab kub lug hauv nrog cev, puas yog?”
“Thaum Huab Tais Yes Xus hais lus rau kuv tom kev, thiab nws txhais
Ntawv rau kuv, mas kuv lub siab kub lug hauv nrog cev, puas yog?”