Hnub Chiv Tim 24 Lub 12 Hlis 2023 (Sunday Homily)

Hnub Chiv tim 24 Lub 12 Hlis Ntuj 2023

Lub lis piam tim 4
Lub caij Tos Huab Tais Yes Xus
Lus Kas 1:26-38

“Kuv yog Huab Tais tus ntxhais txib. Kuv xav kom muaj raws li koj hais.”

Nyob zoo…

Cov kwv tij zoo nyiam sawv daws, hnub no tseem yog hnub chiv lub lis piam tim 4 hauv lub caij Tos Huab Tais. Tab sis mas, hmo no mas peb yuav ua kev zoo siab tos peb tus Huab Tais yug los. 
Hauv lub Moo Zoo hnub no mas, thov caw kwv tij sawv daws ras txog lo lus uas Niam Mab Liab teb rau Ntuj tus tshiab hais tias: “Kuv yog Huab Tais tus ntxhais txib. Kuv xav kom muaj raws li koj hais.” Un ntej Niam Mab Liab yuav txais ua raws li Ntuj lub siab nyiam mas, kuv ntseeg tias Niam Mab Liab yuav tsum txhawj siab kawg. Thaum nws hnov lo lus ntawd mas, nws lub siab nphau npog, nws xav hauv nruab siab tias lo lus hawm ntawd yog dab tsi.” Niam Mab Liab paub tias thaum nws txais Ntuj lo lus no thiab ua raws li Ntuj lub siab nyiam, nws yuav ntsib teeb meem los kev txom nyem dab tsi. Nws lub siab thiaj nphau npog. Tab sis, qhov kawg mas, vim li cas Niam Mab Liab thiaj lees txais Tswv Ntuj Lo Lus “Kuv xav kom muaj raws li koj hais”?
Qhov tseeb yog hais tias nws vam khom rau Tswv Ntuj. Nws muab nws lub siab los npuab Tswv Ntuj. Ntuj tus tshiab hais rau nws tias, Mab Liab, koj tsis txhob ntshai.” Niam Mab Liab nws ntseeg txog Tswv Ntuj. Kuv xav tias nws tseem ntshai, nws tseem txhawj siab, tab sis mas nws vam khom Tswv Ntuj. Nws ntseeg tias Tswv Ntuj yuav saib xyuas nws. 
Kwv tij sawv daws, ib yam Niam Mab Liab, Huab Tais Tswv Ntuj Leej Tub yuav yug los hauv peb lub siab. Peb yuav txais Me Nyuam Yes Xus hauv peb lub neej lawm, peb puas vam khom rau Tswv Ntuj ib yam li Niam Mab Liab ua? Paub zoo lawm tias thaum yus txais Huab Tais Yes Xus hauv yus lub neej lawm, yus tseem muaj teeb meem, tseem muaj kev txhawj siab los kev txom nyem tos peb ua ntej, peb puas tseem teb Tswv Ntuj ib yam li Niam Mab Liab teb tias “Kuv yog Huab Tais tus ntxhais txib. Kuv xav kom muaj raws li koj hais”?
Hauv Lub Moo Zoo hnub no, peb paub zoo lawm tias, Niam Mab Liab yog tus piv txwv rau peb ntawm txoj kev ntseeg txog Tswv Ntuj. Niam Mab Liab xaiv ua raws li Tswv Ntuj lub siab nyiam. Peb cov ntseeg sawv daws kuj ib yam li thiab. Peb yuav tsum ua raws li Niam Mab Liab. Thov kom peb ntseeg tias Tswv Ntuj ua hwj huam yees ntxwv niaj hnub hauv peb lub neej. “Vim tias, tsis muaj ib yam uas Tswv Ntuj ua tsis tau.”

Cov kwv tij zoo nyiam sawv daws, hmo no mas peb yuav cav txog Tswv Ntuj. Peb yuav ua Tswv Ntuj tsaug uas Tswv Ntuj xa Leej Tub twm zeej los yug hauv peb lub neej ua kom peb kaj siab lug. Peb ua Tswv Ntuj.