Hnub Chiv Tim 26 Lub 3 Hlis 2023 (Sunday Homily)

ZAJ NYEEM HNUB TIM 26 LUB 3 HLIS, HNUB CHIV LUB LIS PIAM 5 CAIJ PLAUB CAUG
Hnub Chiv Tim 26 Lub 3 Hlis 2023
Lub caij Plaub Caug
Zam 11:3-7, 17, 20-27, 33-45

Nyob zoo…
“Kuv yog Txoj Kev Sawv Rov Los thiab yog Txoj Sia: tus ntseeg txog kuv, tab yog nws tuag lawm, nws yuav muaj txoj sia nyob. Leej twg ua neej nyob ntseeg txog kuv, nws yuav tsis tuag ib zaug. Koj puas ntseeg qhov ntawd?”
Nyob zoo…
Hnub no yog hnub chiv lub lis piam 5 hauv lub caij Plaub Caug. Hnub chiv yav tom ntej yog Hnub Chiv Nqaum Nplooj lawm. Peb cov neeg ntseeg sawv daws tab tom npaj yus tus kheej ua hmoov txuj xeeb Hmo Hla ua ke. 
Zam Ntawv Moo Zoo hnub no qhia peb tias Yes Xus tsa Las Ntxas Los sawv rov los nyob Npes Tas Nias. Lub lis piam yav dhau los Ntawv Moo Zoo qhia kom peb paub tias Huab Tais Yes Xus yog Dej Pub Txoj Sia Nyob Mus Li thiab yog Qhov Pom Kev ntawm lub qab ntuj no. Hnub chiv Zam qhia kom tseeb tias Yes Xus yog Txoj Kev Sawv Rov Los.
Hauv Ntawv Moo Zoo hnub no, Huab Tais Yes Xus tsa Las Ntxas Los sawv rov los kom muaj txoj sia nyob ib zaug dua. Yes Xus ua li ntawd tsis yog vim tias Las Ntxas Los yog nws tus pooj ywg xwb, tab sis Yes Xus xav kom tsoom sid sawv daws pom Tswv Ntuj lub hwj chim, ces tig los ntseeg txog Tswv Ntuj. Yes Xus ua li ntawd kom sawv daws muaj kev ntseeg txog Tswv Ntuj. 
Thiab hnub no Huab Tais Yes Xus hais cov lus tseem ceeb tshaj rau Mas Tas thiab peb sawv daws paub tias “Kuv yog Txoj Kev Sawv Rov Los thiab yog Txoj Sia: tus ntseeg txog kuv, tab yog nws tuag lawm, nws yuav muaj txoj sia nyob. Leej twg ua neej nyob ntseeg txog kuv, nws yuav tsis tuag ib zaug.” Ces Yes Xus nug Mas Tas thiab peb sawv daws tias  “Koj puas ntseeg qhov ntawd?”
Hnub no, peb hnov tias Yes Xus hu Las Ntxas Los los tawm lub ntxa kom muaj txoj sia nyob, kom muaj kev ywj pheej, kom muaj kev ywj pheej ntawm lub ntxa uas muaj kev tsau ntuj nti, kev ntshai, kev tuag. Peb sawv daws kuj zoo ib yam thiab. Yus muaj yus tus kheej lub ntxa. Nyob hauv lub ntxa ntawd muaj kev tsau ntuj nti, muaj kev txhaum zoo li: kev ua dev ua npua, kev teev dab, kev zes luag txij luag nkawm, kev nrhiav kev zes poj niam, cov txiv neej nrog txiv neej ua dev ua npua, kev tub sab, kev ntshaw nyiaj txiag, kev quav cawv, kev foom phem rau luag, cov noj luag zog thiab ntau yam. Huab Tais Yes Xus tib leeg xwb thiaj yog tus muaj hwj chim hu peb los tawm lub ntxa ntawd kom peb muaj kev ywj pheej ntawm qhov tsau ntuj nti, ntawm kev txhaum, kev tsis zoo. Vim li ntawd, kwv tij sawv daws, peb hnov Huab Tais Yes Xus Lo Lus lawm, peb puas xav tawm los ntawm peb lub ntxa? Hnub no, thaum coob tus Yus Das uas tuaj xyuas Mab Liab tau pom qhov uas Yes Xus ua rau Las Ntxas Los, ces lawv ntseeg txog Yes Xus. Lawv pib tawm los ntawm lawv lub ntxa thiab. Lawv paub tias:
“Huab Tais Yes Xus yog Txoj Kev Sawv Rov Los thiab yog Txoj Sia: tus ntseeg txog nws, tab yog nws tuag lawm, nws yuav muaj txoj sia nyob mus li.”
Nyob zoo sawv daws.