Hnub Chiv Tim 27 Lub 11 Hlis 2022 (Sunday Homily)

Hnub Chiv Tim 27 Lub 11 Hlis 2022
Lub caij Tos Huab Tais Yes Xus
Mas Tais: 24:37-44

“Nej zov hmo mog, vim nej tsis paub hnub twg nej tus Huab Tais yuav los. Nej yuav sawb sim kom txhij, vim Neeg Leej Tub yuav los lub sij hawm uas nej tsis nco faj.”
Nyob zoo…
Hnub no yog thawj hnub chiv hauv lub caij Tos Huab Tais Yes Xus. Lub Koom Txoos pib siv xyoo tshiab ntawm ntawm Kas Tos Liv kab ke teev Ntuj. Xyoo no yog xyoo A hauv Kas Tos Liv kab ke teev Ntuj. Hauv Ntawv Moo Zoo hnub no Mas Tais qhia txog “Lub caij Neeg Leej Tub yuav rov los nyob.” Nws qhia ntxiv tias thaum lub caij ntawd los txog, ob tug neeg uas nyob tom liaj, luag yuav coj ib tug mus, tseg lwm tus. Ob tug poj niam uas tab tom zom zeb, luag yuav coj ib tug mus, tseg lwm tus. Cov lus no qhia kom peb paub txog qhov tiag hais tias sawv daws muaj hnub kawg, sawv daws yuav puv ib puas nees kaum xyoo. Ua li ntawd, yus yuav tsum ceev faj, yus yuav tsum npaj kom txhuj yus tus kheej. 
Lub caij no thiaj hu tias lub caij “tos” Huab Tais Yes Xus. Peb, cov neeg ntseeg tab tom tos Yes Xus, peb tus Huab Tais los kav peb thiab kav niaj teb neeg no. txawm li ntawd los, peb paub tias lub caij no peb yuav tsum npaj peb lub neej kom txawj ua qhov zoo, kom txawj ua lub neej hauv txoj kev sib nyiam sib hlub, kom txawj ua neej hauv txoj kev zam txim rau luag tej, rau cov tsis tshua xav zoo rau peb los ua zoo rau peb thiab. 
Lub caij tos Huab Tais Yes Xus los txog ua rau peb nco tsoov txog peb cov ntseeg lub hom phiaj, lub hom phiaj ntawm cov ntseeg Kas Tos Liv, ua rau peb nco tau, tsis poob zoo. Thaum peb npaj kom txhij yus lub neej lawm, lub sij hawm ntawd los txog, peb kuj tsis ntshai dab tsi lawm.  

“Nej zov hmo mog, vim nej tsis paub hnub twg nej tus Huab Tais yuav los. Nej yuav sawb sim kom txhij, vim Neeg Leej Tub yuav los lub sij hawm uas nej tsis nco faj.”