Hnub Chiv Tim 27 Lub 3 Hlis Ntuj 2022 (Sunday Homily)

Hnub Chiv Tim 27 Lub 3 Hlis Ntuj 2022

Lub Caij Plaub Caug tim 4

Lus Kas 15: 1-3, 11-32

“Thaum tus tub tseem los txog deb, nws txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tub tub ntev loo.”

Nyob zoo…

Huab Tais Yes Xus hais zaj paj lug no qhia cov mloog nws tias Leej Txiv txoj kev nyiam kev hlub tib neeg loj tshaj plaws. Zaj paj lug “Tub tub loj leeb rov los tsev” piav txog Leej Txiv yog ib yam li leej txiv hauv zaj paj lug. Txawm tias nws tus tub ntxawg pov nws tseg, thaum nws rov los tsev, leej txiv kuj zoo siab kawg. “Thaum tus tub tseem los txog deb, leej txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tub tub ntev loo.” Leej txiv ua li ntawd, ua ntej tus tub ntxawg yuav hais ib lo lus xwb.

Lus Kas xav piav li no. Hauv zaj paj lug no, leej txiv yog Huab Tais Leej Txiv, tus tub ntxawg los tus tub uas uas yuam kev lawm yog cov neeg txhaum, thiab tus tub hlob yog cov thawj coj ntawm haiv neeg Israel. Raws li zaj paj lug qhia, tus tub hlob khib siab uas leej txiv zam txim rau nws tus kwv. Nws ua zoo tab sis nws tus kwv ua yuav kev, ua cas tus kwv yuav tsum tau txais kev zam txim, yam zoo. Tswv Ntuj tsis xav zoo li tib neeg. Tswv Ntuj lub siab dav dua tib neeg lub siab.

Lub Moo Zoo hnub no hais kom pom tseeb txog Huab Tais Leej Txiv txoj kev nyiam kev hlub thiab kev zam txim rau tib neeg. Tab sis yog tib neeg yuav tsum tu siab uas lawv ua txhaum, uas lawv ua lub neej nyob hauv txoj kev txhaum. Tib neeg yuav tsum tig los yuav lub siab tshiab, tig los nhriav Tswv Ntuj, tig los nhriav Tswv Ntuj txoj kev nyiam kev hlub hauv txoj kev ua lub neej ncaj ncees. Zoo li tus tub ntxawg, nws paub tias nws ua yuav kev lawm, nws tu siab thiab txiav tsim siab rov qab los nhriav leej txiv tus siab zoo.

Kwv tij hmoob sawv daws, tsis ntev lawm, peb yuav ua hmoov tsuj xeeb lub lis piam ntshiab, ces ua hmoov tsuj xeeb Huab Tais Yes Xus sawv rov los. Thov kom peb npaj peb lub siab lub ntsws kom dawb kom huv txais Huab Tais Yes Xus hauv peb lub neej.