Hnub Chiv Tim 28 Lub 8 Hlis 2022 (Sunday Homily)

Hnub Chiv Tim 28 Lub 8 Hlis 2022

Lub caij nyob nruab xyoo

Lus Kas 14:1,7-14

Nyob zoo ib tsoom…
Hauv Ntawv Moo Zoo peb tau hnov hnub no Huab Tais Yes Xus hais ib zag paj lug qhia
peb sawv daws. Hauv zaj paj lug no muaj ob lo lus qhia tseem ceeb hais rau peb hnub
no.
Lo lus qhia tim ib hais txog tus uas nws tsa nws siab, mas Tswv Ntuj yuav txo nws qis,
hos tus uas nws txo nws qis, mas Tswv Ntuj yuav tsa nws siab. Kev ua neeg tsis muab
hlob, ua neeg me, ua neeg paub cai yog ib qho tseem ceeb tshaj. Vim tias Tswv Ntuj
nyiam cov neeg tsis muab hlob, cov neeg me. Tswv Ntuj xaiv niam Mab Liab los ua
Tswv Ntuj leej niam kuj vim tias nws yog ib tug neeg me, tsis muab hlob. Tswv Ntuj thiaj
nrog nws nyob ib txhiab ib txhis. Ua neeg me xwb, ces Tswv Ntuj yuav hais rau koj tias
“Npawg, koj nce los pem toj.” Ces koj yuav tau ntsej muag nyob ntawm cov neeg tuaj
nrog koj koom rooj qav xub ntiag.
Lo lus qhia tim ob, Huab Tais Yes Xus hais tias “thaum koj ua ib roog qav, koj nqua hu
cov pluag, cov tu tes tu taw, cov ceg tawv, cov dig muag. Koj yuav zoo siab, vim lawv
tsis muaj dab tsi pauj rau koj. Thaum cov neeg siab ncaj yuav sawv rov los, mas Ntuj
yuav pauj rau koj. Cov lus no qhia kom peb txawj hlub luag tej, qhia kom peb muaj kev
khuv leej luag tej luag lwm tus, txawj sib hlub sib pab lwm tus. Txhob txawj pab peb cov
kwv tij neeg tsa hauv yus tsev neeg xwb. Tab sis cov neeg pluag txom nyem, cov neeg
tsis muaj leej twg xav sib tham, cov neeg tsis muaj leej twg xav nrog lawv sib pab sib
pawg, cov neeg muaj kev nyuaj siab kawg, cov neeg muaj teeb meem hauv lub neej,
cov neeg tsis muaj leej twg nyiam. Ib yam li Huab Tais Yes Xus hais, cov neeg no tsis
muaj dab tsi pauj rau peb. Thiab txhob xav dab tsi pauj rov qab. Kev pub rau luag tej
uas dawb thiab huv kawg yog kev pub uas tus pub tsis xav dab tsi pauj rov qab. Ces
Tswv Ntuj yuav pauj rau nej, rau peb sawv daws. Nej puas ntseeg li ntawd? Nej puas
ntseeg tias Tswv Ntuj yuav pauj rau nej? Thov nej ntseeg tiag tiag mas, vim tias Huab
Tais Yes Xus, nws tus kheej yog tus hais rau peb.
Cov lus xav tswv yim hnub no, Thov nej sawv daws nco kom zoo tias tias ib Kev ua
neeg tsis muab hlob, ua neeg me, ua neeg paub cai yog ib qho tseem ceeb tshaj. Thiab
ob kev txawj hlub luag tej, qhia kom peb muaj kev khuv leej luag tej luag lwm tus, txawj
sib hlub sib pab lwm tus.
Thov Tswv Ntuj nrog nej nyob, ua nej siab kaj lug mog!