Hnub Chiv Tim 29 Lub 10 Hli 2023 (Sunday Homily)

Hnub Chiv tim 29 Lub 10 Hlis Ntuj 2023
Lub lis piam tim 30
Lub caij nyob nruab xyoo
Mas Tais 22:34-40

“koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj.”
Nyob zoo…
Kwv tij zoo nyiam sawv daws, ib txwm mas peb tau hnov Huab Tais Yes Xus qhia lo lus qhia tseem ceeb plaws los txoj cai loj tshaj cov hais tias “koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj.” Peb to taub me ntsis lawm. Lo lus qhia no, tsis yog hais tias Huab Tais Yes Xus nws tus kheej lam hais xwb. Yes Xus muab lo lus qhia no los ntawm Phau Ntawv Txoj Cai Ob 6:5 thiab Phau Ntawv Les Vis 19:18; txoj cai no yog Mais Xes txoj cai. Vim li ntawd, Huab Tais Tswv Ntuj muab txoj cai loj no rau Mais Xes ntev ntev lawm kom lawv coj los ua neej ib yam li Tswv Ntuj qhia, yog tias ua neej nyob txoj kev nyiam kev hlub. 
Ntau zaus cov Fas Lis Xais, cov Xas Dus Kais, cov kws lij choj hauv Ntawv Moo Zoo los peb sawv daws niaj hnub no, tsis nkag siab lo lus “nyiam” Huab Tais Tswv Ntuj thiab “nyiam” tus nyob ze koj. Lo lus “nyiam” no ntau zaus peb tsis to taub tiag tiag. Peb xav tias lo lus nyiam hauv Ntawv Moo Zoo muaj lub ntsiab zoo li lo lus “nyiam” los lo lus “hlub” peb siv niaj hnub no. qhov tiag mas tsis yog li ntawd. Feem ntau mas, peb siv lo lus nyiam ib yam li kev siab xav los kev xav hauv lub siab, txoj kev xav ua lus As Kiv hais tias “emotion” or “feelings.” Kev nyiam hauv Ntawv Ntshiab tsis yog zoo li ntawd, kev nyiam uas Yes Xus hais txog yog kev nyiam hauv Phau Ntawv Txoj Cai Ob 6:5 yog tias Yahweh txoj kev nyiam. Txoj kev nyiam no ua rau peb yuav tsum cev tes ua qhov zoo rau luag tej. Yus nyob twj ywm tsis ua dab tsi tsis tyau. Yus hais tias yus nyiam Tswv Ntuj thiab nyiam luag tej, tab sis mas yus tsis ua dab tsis muaj qab hau rau lwm tus, yus tsis cev tes pab lwm tus tsis tau. Tswv Ntuj txoj kev nyiam tsis yog zoo li ntawd. Yus hais tias yus nyiam Tswv Ntuj, yus ntseeg txog Tswv Ntuj, tab sis, yus tsis xav pab lwm tus, yus tsis xav nyiam lwm tus tsis tau. Vim li ntawd, Zam tus sau Tsab Ntawv thiaj hais tias “Yog muaj ib tug hais tias : “kuv nyiam Tswv Ntuj, tab sis nws ntxub nws tus kwv, mas nws yog ib tug neeg dag. Tus tsis nyiam nws tus kwv uas qhov muag pom tau, mas nws nyiam tsis tau Tswv Ntuj uas nws qhov muag tsis pom” (Zam 4:20). 
Lo lus “nyiam” hauv Phau Ntawv Cog lus tshiab, siv lo lus “agape” muaj lub ntsiab tias yus nyiam Tswv Ntuj, yus nyiam cov kwv tij, yus nyiam luag tej, yus khuv leej lawv, yus zam txim rau lawv, yus faib qhov zoo rau lawv, yus tsis ua neeg qia dub rau lawv. Kwv tij sawv daws, Tswv Ntuj txoj kev nyiam tsis yog txoj cai lij choj, tab sis yog kev sib txheeb sib raug zoo. Yus yog neeg siab zoo, yus ua siab ntev thaum luag tej ua qhov tsis tshua zoo, thaum yus cov kwv tij tej zaum tsis tshua zoo nyiam, yus ua siab ntev, vim yus nyiam lawv.  Txoj kev nyiam no tsis yog lo lus hais tawm lub qhov ncauj xwb, tab sis mas, yuav tsum ua kom tshwm sim tuaj hauv lub neej, hauv tsev neeg, hauv cov pawg ntseeg sawv daws, hauv lub koom txoos. 
Kwv tij hmoob sawv daws, ua neej nyob hauv txoj kev nyiam uas Yes Xus hais txog tsis yooj yim kiag li, tab sis, kuj tsis nyuaj dhau thiab. Qhov tseem ceeb yog tias peb maj ma ua, peb maj mam nyiam tus nyob zep eb, ces Tswv Ntuj txoj kev nyiam kuj yuav maj mam tshwm sim hauv peb lub neej tiag tiag. 
Thov Tswv Ntuj foom hmoov zoo rau peb txhua leej txhua tus mog!