Hnub Chiv Tim 3 Lub 12 Hlis 2023 (Sunday Homily)

Hnub Chiv tim 3 Lub 12 Hlis Ntuj 2023

Lub lis piam tim 1
Lub caij Tos Huab Tais Yes Xus
Mas Kos 13: 33-37
“Nej ceev faj, nej zov hmo, vim nej tsis paub tias thaum twg thiaj yog lub sij hawm.”
Nyob zoo,…
Cov kwv tij zoo nyiam sawv daws, hnub no yog thawj hnub chiv hauv lub caij Tos Huab
Tais Yes Xus. Lub Koom Txoos Kas Tos Liv pib siv xyoo tshiab ntawm Kas Tos Liv kab
ke teev Ntuj. Xyoo no yog xyoo B hauv Kas Tos Liv kab ke teev Ntuj. Hauv Ntawv Moo
Zoo hnub no Mas Kos qhia kom peb sawv daws zov hmo tos Huab Tais Yes Xus. “Nej
ceev faj, nej zov hmo, vim nej tsis paub tias thaum twg thiaj yog lub sij hawm.” Ua li
ntawd, mas “nej zov hmo mog.”
Tswv Ntuj Lo Lus no, “nej zov hmo mog” yog cov lus peb cov ntseeg sawv daws yuav
tsum xav tswv yim ras txog. Nej zov hmo txhais tias yus yuav tsum npaj yus tus kheej
kom txhij. Yus yuav tsum npaj yus tus kheej kom tsim nyog txais Huab Tais Yes Xus los
nyob rau hauv. Vim li ntawd, yus tsis nyob twj ywm xwb los tsis ua dab tsi li, tab sis
mas, yus yuav tsum hloov yus lub neej, lub siab, lub tswv yim kom ncaj hauv Tswv Ntuj
txoj kev.
Peb yuav npaj zoo li cas thiaj tsim nyog tos txais Huab Tais Yes Xus hauv lub caij no?
Yam tim ib thov peb quag thov Ntuj. Thaum yus thov Ntuj mas, yus tab tom nrog Tswv
Ntuj sib tham. Thaum yus nquag teev Ntuj mas yus yuav paub tias Tswv Ntuj nyob nrog
nraim yus. Hauv yus lub siab lub tswv yim yuav muaj Tswv Ntuj tib leeg xwb.
Yam tim ob thov peb nyeem ntawv Ntshiab los Tswv Ntuj Lo Lus. Txawm tias yus
nyeem ib qib ib zaj luv luv xwb kuj zoo kawg li lawm. Tswv Ntuj Lo Lus txawm tias ib lo
lus los ob peb lo lus kuj muaj hwj huam muaj hwj chim hloov yus lub neej tshaj lawm.
Tswv Ntuj lo lus yuav ua kom peb muaj zog, pab peb kom yeej teeb meem, kom yeej
kev txom nyem kev nyuaj siab tau.
Yam tim peb, koom thaj txi Ntuj. Cov neeg ntseeg lub siab lub tswv yim yog Huab Tais
Yes Xus lub cev thiab cov ntshav hauv thaj txi Ntuj. Thaum yus tsis xyeej, yus yuav
tsum nrhiav sij hawm mus teev Ntuj hauv hnub chiv. Hauv lub thaj txi Ntuj mas, yus tau
ntsib Tswv Ntuj thiab cov kwv tij neeg ntseeg sawv daws thiab.
Yam tim 4 no mas, yus yuav tsum sim hloov lub neej qub uas tsis zoo los ua neej tshiab
kom xis Tswv Ntuj siab yog tias taug kev hauv Tswv Ntuj txoj kev nyiam kev hlub. Yam
twg uas tsis tshua zoo, thov kom peb tso pov tseg, ces pib lub neej tshiab ua kom ncaj
kom ncees. Siv Tswv Ntuj lo lus coj peb lub neej. Yog kev meem lub siab lub ntsws tsis
ncaj kom xwm yeem kom zoo! Kev ua lub neej uas nkhaus mus nkhaus los yuav tsum
taug kom ncaj. Lub siab lub ntsws uas tsis huv tsis ncaj yuav tsum ua kom huv kom
ncaj tuaj. Kev npaj yam tseem ceeb yog npaj tej kev no.
Qhov no, yuav pab peb kom npaj yus tus kheej kom txhij txais Huab Tais Yes Xus.
Thiab yog peb pab yus lub neej kom txhij lawm mas, Lub Caij Tos Huab Tais Yes Xus
yuav muaj qab hau rau peb txoj kev ntseeg. Peb txoj kev ntseeg thiaj hlob tuaj zuj zus.
Thov nej sawv daws npaj siab tos tus cawm Seej uas yuav tuaj mog!