Hnub Chiv Tim 30 Lub 4 Hlis 2023 (Sunday Homily)

Hnub Chiv Tim 30 Lub 4 Hlis Ntuj 2022

Lub lis piam 3 hauv lub Caij Hla

Zam 10:1-10

“tus zov yaj rooj loog qhib qhov rooj rau nws, cov yaj mloog nws lub suab. Thiab cov yaj lawv nws qab, vim lawv paub nws lub suab.”

Nyob zoo…

Kwv tij zoo nyiam sawv daws, hnub no yog hnub chiv ua hmoov cav txog tus Zoo Tswv Zov Yaj. Hauv Ntawv Moo Zoo hnub no mas Huab Tais Yes Xus hais ib zaj paj lug txog tus tswv zov yaj thiab cov yaj. Tus Zoo Tswv Zov Yaj yog Tswv Ntuj los yog Huab Tais Yes Xus. Cov yaj txhais tias peb cov neeg ntseeg txog Tswv Ntuj sawv daws. 

Huab Tais Yes Xus hais tias  “tus zov yaj rooj loog qhib qhov rooj rau nws, cov yaj mloog nws lub suab. Thiab cov yaj lawv nws qab, vim lawv paub nws lub suab.” Ua cas ho cov yaj thiaj mloog nws lub suab? Cov yaj mloog nws lub suab kuj vim tias tus zoo tswv zov yaj hu nws cov yaj, nws tuav lawv ib leeg zuj zus lub npe, nws coj lawv mus. Cov yaj yuav tsis mus raws lwm tus, lawv yuav khiav ntawm lwm tus, vim lawv tsis paub luag tej lub suab.” Ib qho tseem ceeb hauv zaj no yog “Tswv Ntuj lub suab.” Yuav tsum ua li cas peb thiaj hnov tau Tswv Ntuj lub suab? Yuav tsum ua li cas peb thiaj hnov tau Huab Tais Yes Xus lub suab? Yuav tsum ua li cas peb thiaj nco tau Tswv Ntuj lub suab? Peb thiaj paub tias lub suab no yog luag tej lub suab, tsis yog Tswv Ntuj lub suab. 

Kwv tij hmoob, ib yam li peb sawv daws paub, niaj hnub no, muaj kev vam meej ntau yam tshwm sim tuaj ua rau peb muaj noj muaj haus, muaj kev zoo siab. Muaj internet muaj social media los yog สังคม online ua rau peb sib txuas lus tau, ua rau peb nyob ze lwm tus tshaj dua. Txawm li cas los xij, thaum peb muaj kev vam meej, kev lom zem thiab kev yooj yim ntau yam, kuj muaj ntau lub suab nrov nrov dua Tswv Ntuj lub suab. Ntau zaus ua rau peb mloog tsis tau, ua rau peb hnov tsis tau Tswv Ntuj lub suab. Ntau zaus cov lub suab no ua rau peb xav tias qhov tseem ceeb tshaj plaws tsis yog Tswv Ntuj tab sis yog kev yooj yim, kev vam meej, kev lom zem uas lub qab ntuj no thiab tiam neeg no pub rau peb. Txoj kev ntseeg tsis muaj lub ntsiab rau peb, txoj kev ntseeg tsis muaj lub ntsiab ntawm txoj sia lawm. Txoj kev ntseeg txog Tswv Ntuj tsis yog ib qhov tseem ceeb tshaj plaws lawm. Ua li ntawd, peb yuav tsum ceev faj. Peb yuav tsum nhriav Tswv Ntuj lub suab kom tau, peb yuav tsum nco Tswv Ntuj lub suab kom tau. 

Yuav tsum ua li cas peb thiaj hnov tau Huab Tais Yes Xus lub suab? Qhov tiag yog tias Tswv Ntuj hais rau peb sawv daws txhua txhia hnub, tab sis mas, ntau zaus peb tsis mloog nws lub suab. Thaum yus nyob ntsiag to, tsis muaj lwm lub suab ua rau yus meem txom, ces yus thiaj hnov Tswv Ntuj lub suab hais lus rau yus. Peb cov neeg ntseeg sawv daws mloog Tswv Ntuj lo lus hauv lub thaj txi Ntuj, hauv Ntawv Ntshiab, thaum peb sau siab nyeem Ntawv Moo thiab teev Ntuj, thiab hauv lub Koom Txoos Catholic, thiab yus mloog Leej Ntuj Plig Ntshiab lub suab hauv yus lub siab. 

“Cov yaj mloog nws lub suab. Thiab cov yaj lawv nws qab, vim lawv paub nws lub suab.”

Nyob zoo sawv daws!