Hnub Chiv Tim 4 Lub 6 Hlis 2023 (Sunday Homily)

Hnub Chiv Tim 4 Lub 6 Hlis 2023
Lub Caij Nyob Nruab Xyoo  
Zam Ntawv Moo Zoo 3:16-18

“Vim Tswv Ntuj nyiam lub qab ntuj neeg npaum no: nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.”
Nyob zoo…
Hnub chiv no yog hnub hwm peb leeg huab tais. Yav dhau los thaum nhub nyoog hwm Peb Leeg Huab Tais, peb tau hnov Ntawv Moo Zoo hais txog Leej Txiv, Leej Tub, thiab Leej Ntuj Plig. Tab sis Zam Ntawv Moo Zoo hnub no qhia kom peb paub tias qhov tseeb yog tias Peb Leeg Huab Tais yog “kev nyiam.” “Vim Tswv Ntuj nyiam lub qab ntuj neeg npaum no: nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.” cov lus zaj no, Zam xav qhia kom cov ntseeg sawv daws paub kom meej thiab nco kom zoo tias tas ib puas tsav yam uas Tswv Ntuj tsim kom tshwm sim tuaj kuj vim rau qhov hais tias Tswv Ntuj nyiam lub qab ntuj neeg tshaj plaws. Thiab txhua txhia zaus, peb hais “Tswv Ntuj” txhais tias Leej Txiv, Leej Tub thiab Leej Ntuj Plig Ntshiab.
Leej Txiv, Leej Tub thiab Leej Ntuj Plig ua hauj lwm ua ke. Nco tsoov tias muaj Tswv Ntuj ib Leeg xwb. Peb hais txog peb leej Huab Tais, tsis txhias tias muaj Tswv Ntuj peb leeg. Tab sis hauv ib Leeg Tswv Ntuj muaj peb leeg huab Tais uas Yog Huab Tais Leej Txiv muaj hwj huam tas nrho, yog tus tsim ntuj tsim teb, thiab Huab Tais Leeg Tub twm zeej, yog peb tus Huab Tais Yes Xus. Thiab Huab Tais Leej Ntuj Plig Ntshiab tus ua kom Leej Tub xeeb los ua neeg nyob ntiaj teb no. Thiab Nws tshoj tib neeg siab kom tib neeg taug Tswv Ntuj txoj kev hauv lub Koom Txoos Ntshiab. Yes Xus hias tias Leej Ntuj Plig yuav nqes los nrog cov neeg ntseeg nyob, Yes Xus kuj yuav nrog peb sawv daws nyob mus li mus txog hnub ntiaj teb kawg. 
 Hais txog Peb Leeg Huab Tais tsis yooj yim kiag li. Peb paub tias peb paub txog Tswv Ntuj tsis tag nrho, thaum peb ua li ntawd tau, peb kuj yog Tswv Ntuj lawm, puag yog? Li cas los xij, kev txuj uas peb paub txog Tswv Ntuj kuj txaus lawm, txaum ua kom peb ntseeg tias Tswv Ntuj nyiam peb sawv daws txhua leeg txhua lus, txaum ua kom peb txoj kev ntseeg tsis tu ncua, txaum ua kom peb muaj txoj sia nyob mus li.
Nco tsoov tias ua ntej teev Ntuj los thov Ntuj los Ua thaj txi Ntuj, peb ua ntoo cuam lub cim thiab hais tias “Hu txog Leej Txiv thiab Leej Tub thiab Leej Ntuj Plig lub npe. Ua li.” Qhov tseeb yog tias peb hu txog Huab Tais Peb Leeg tas li, thaum peb ua ntoo cuam lub cim. 
Kev nyiam kev hnub ntawm Tswv Ntuj ua rau txhua tsav txhua yam tshwm sim tuaj tau tsis tib neeg, tsis hais tsob ntoo, tsis hais cov tsiaj thiab lwm yam. Yog hais tias peb tsis nkag siab lo lus qhia txog Peb Leeg Huab Tais, kuj thov kom peb paub tias nruab nrab Leej Txiv, Leej Tub, thiab Leej Ntuj Plig Ntshiab yog kev nyiam, vim tias Tswv Ntuj yog kev nyiam.
Nyob zoo sawv daws!