Hnub Chiv Tim 5 Lub 3 Hlis 2023 (Sunday Homily)

Hnub Chiv Tim 5 Lub 3 Hlis 2023
Lub caij Plaub Caug
Mas Tais 17: 1-19

“Tus no, yog kuv leej tub uas kuv nyiam, nws yog kuv qhov chaw zoo siab, nej mloog nws mog.”
Nyob zoo, …
Nyob zoo kwv tij phooj ywg sawv daws, hauv Ntawv Moo Zoo hnub no Huab Tais Yes Xus coj nws cov thwj tim: Pob Zeb, Yas Kos thiab Zam nce mus saum ib lub roob siab. Nyob ntawd, lawv pom Yes Xus lub hwj chim tawm los. Lawv pom nws lub ntsej muag ci ntsa iab zoo li lub hnub, nws cov ris tsho ci dawb paug li qhov pom kev. Tsis tas li ntawd, lawv thseem pom Mais Xes thiab Es Lias tam los nrog Yes Xus tham. Mais Xes sawv cev Israel txoj kev cai.  Peb paub zoo tias Es Lias sawv cev Israel cov yaj saub. Ob yam no tseem ceeb tshaj plaws hauv Isarel txoj kev ntseeg txog Huab Tais Tswv Ntuj, Yas Ves. Tab sis, ntawm peb mas, Huab Tais Yes Xus loj tshaj dua ob yam no, Huab Tais Yes Xus muaj hwj chim tshaj dua ob yam no, Huab Tais Yes Xus tseem ceeb tshaj plaws.  Nyob hauv zaj no, muaj lub cim ntawm Ntawv Ntshiab ntau yam, tab sis mas, kuv thov caw peb sawv daws saib ntawm cov thwj tim: Pob Zeb, Yas Kos thiab Zam uas Huab Tais Yes Xus coj lawv nrog nws mus saum roob siab. Yes Xus xaiv 3 tug thwj tim no kuj muaj lub hom phiaj thiab. Qhov tiag los mas yog hais tias 3 tug thwj tim no sawv cev peb sawv daws, sawv cev Yes Xus cov thwj tim sawv daws, sawv cev cov ntseeg txog Yes Xus sawv daws. Kev ua neej raws Yes Xus qab, kev ua neeg ntseeg txog Yes Xus tsis yog ib qho yooj yim los tsis yog qhov hais tias yus pom cov hwj huam yees ntxwv los lub hwj chim tawm los ntawm Yes Xus ces yus ntseeg, ces yus ua raws li Yes Xus qhia xwb. Thov kom peb txoj kev ntseeg tob dua qhov no. 
Lub suab hais hauv twv huab tuaj rau Yes Xus cov thwj tim tias “Tus no, yog kuv leej tub uas kuv nyiam, nws yog kuv qhov chaw zoo siab, nej mloog nws mog” yog cov lus hais kom cov thwj tim cia siab tias tus no yog Tswv Ntuj leej Tub tiag tiag. “Nej mloog nws mog” yog qhov uas cov Yes Xus cov thwj tim yuav tsum ua kom tau! Yog tias yus tsis mloog Tswv Ntuj lo lus lawm, yus tseem hu yus tus kheej Yes Xus cov thwj tim tau li cas? Hauv txoj kev ua neej raws Yes Xus qab, cov thwj tim yuav tsum pom ntau yam zoo ntau yam phem, tab sis mas, lawv puas muaj kev ntseeg nruaj nreb. Yam tom ntej, Huab Tais Xes Xus yuav tsum raug kev txom nyem, nws yuav raug luag tsa nws rau saum ntoo cuam, nws yuav raug luag thuam thiab hiam. Txoj kev ua Yes Xus thwj tim yog qhov no. Txoj kev ua Yes Xus thwj tim yog lub neej, yog txoj sia. 
Thov Huab Tais Tswv Ntuj foom koob foom hmoov rau peb sawv daws txhua leej txhua tus kom peb muaj kev kaj siab lug mus li.