Hnub Chiv Tim 6 Lub 11 Hlis 2022 (Sunday Homily)

Hnub Chiv Tim 6 Lub 11 Hlis 2022

Lub caij nyob nruab xyoo
Mas Tais 5:1-12
“Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog
lawv li.”
Nyob zoo…
Kwv tij hmoob sawv daws, Ntawv Moo Zoo hnub no qhia kom peb paub tias Ntuj lub
Ceeb Tsheej nyob tsis deb peb lawm. Huab Tais Yes Xus qhia kom tseeb rau sawv
daws paub txog lub neej uas Tswv Ntuj nyiam yog zoo li cas. Tej zaus muaj lo lus nug
hais tias cov tau txoj hmoov zoo yog leej twg?
Huab Tais Yes Xus hais tias cov tau txoj hmoov zoo yog cov pluag hauv nruab siab,
yog cov siab zoo, yog cov quaj ntsuag, yog cov tshaib thiab nqhis txoj kev ncaj, yog cov
hlub luag tej, yog cov siab huv, yog cov tsim kev thaj yeeb, yog cov raug luag hiam vim
txoj kev ncaj. Tswv Ntuj nyiam cov no tshaj plaws. Tswv Ntuj pab lawv thiab nrog lawv
nyob. Thaum muaj teeb meem los kev txom nyem hnyav npaum li cas, lawv kuj yeej tau
vim tias Tswv Ntuj pab lawv, Tswv Ntuj nyiam lawv.
Txoj hmoov zoo hauv Mas Tais Ntawv Moo Zoo peb tau hnov hnub no, yog qhov tseeb
uas Huab Tais Yes Xus yuav tau txais. Huab Tais Yes Xus quaj ntsuag kawg ua ntej
lawv tsa nws rau saum ntoo cuam. Nyob saum ntoo cuam nws raug luag thuam nws
thiab hiam nws. Tab sis mas Huab Tais Yes Xus yog neeg pluag hauv nruab siab, nws
siab zoo, nws hlub luag tej, nws siab huv, nws tsim kev thaj yeeb.
Huab Tais Yes Xus yog tus piv txwv rau peb cov neeg ntseeg sawv daws txhua leej
txhua tus. Nws yog tus yam txwv hais tias peb thiab, peb kuj yuav raug luag tej thuam
peb los hiam peb, peb kuj yuav quaj ntsuag, peb kuj yuav muaj kev txom nyem thiab.
Tab sis, peb yuav ua neej zoo li cas? Peb yuav ntxub luag tej los hlub luag tej, peb yuav
ua siab zoo los siab phem? Peb yuav ua siab dawb siab huv los siab dub siab phem.
Peb yuav ua neej ncaj los ua neej tsis ncaj ncees? Peb xaiv tau, peb yuav ua Huab Tais
Yes Xus tus yam txwv los yuav ua lwm tus. Yog peb ua Yes Xus tus yam txwv, peb
paub kawg tias peb yuav tau txais txoj hmoov zoo. Vim tias nws paub tseem tias “Nej
zoo siab thiab nej hom khaj mog, vim nej yuav tau txais koob haum loj nyob saum ntuj.”
Thov Tswv Ntuj foom koob foom hmoov rau kwv tij hmoob sawv daws txhua leej txhua
tus mog!