Hnub Chiv Tim 6 Lub 8 Hli 2023 (Sunday Homily)

Hnub Chiv tim 6 Lub 8 Hli Ntuj

Yes Yus lub hwj chim tawm los

Lub caij Nyob Nruab Xyoo

Mas Tais 17:1-9

Kwv tij hmoob sawv daws, hnub no lub Koom Txoos Kas Tos Liv hwm txog Huab Tais Yes Xus lub hwj chim tawm los rau 3 tug Hauv Paus Xa lus pom. Leej Ntshiab Mas Tais piav tias Yes Xus lub ntsej muag ci ntsa iab zoo li lub hnub, nws cov ris tsho ci dawb paug li qhov pom kev. Mais Xes thiab Es Lias nkawd tawm los nrog Yes Xus tham. Ces muaj ib lub suab hais hauv twv huab tuaj tias “Tus no, yog kuv leej tub uas kuv nyiam, nws yog kuv qhov chaw zoo siab, nej mloog nws mog!” Ntawv Moo Zoo zaj no qhia tias Huab Tais Yes Xus yog Tswv Ntuj Leej Tub, yog nws tuaj ntawm Tswv Ntuj tuaj. Tswv Ntuj xa Huab Tais Yes Xus los pab tib neeg. Tswv Ntuj xa Huab Tais Yes Xus, nws Leej Tub Twm Zeej los cawm peb sawv daws ntawm kev txhaum, cawm peb ntawm kev tsaus ntuj nti. 

Kwv tij sawv daws, Pob Zeb, Yas Kos thiab Zam pom Yes Xus lub hwj chim, lawv pom Mais Xes uas yog tus loj tshaj plaws ntawm His Xas Lais kev cai thiab Es Lias, tus yaj saub loj tshaj plaws. Lawv paub hnov lub suab hais hauv twv haub tuaj zeem tseeb tias Yes Xus yog Tswv Ntuj Leej Tub. Qhov no yog Yes Xus lub hwj chim. Qhov no muaj lub ntsiab dab tsi rau cov thwj tim? Qhov no, muaj lub ntsiab dab tsi rau peb? 

Thaum Yes Xus coj lawv nqes saum roob los, nws txwv lawv tias txhob qhia qhov lawv tau pom rau leej twg li, tos kom Neeg Leej Tub sawv hauv cov tuag rov los tso. Txog zaj no, peb pom tias qhov tiag yog tias Yes Xus lub hwj chim tawm los yog ib qho sib txuas Yes Xus txoj kev txom nyem, kev tuag thiab kev sawv rov los. Yes Xus lub hwj chim yog tias nws yog Tswv Ntuj Leej Tub, tab sis nws yuav tsum taug txoj kev txom nyem, kev tuag thiab nws yeej kev tuag sawv rov los muaj txoj sia tshiab.

Vim li ntawd, ntawm peb mas, kwv tij sawv daws, peb yog Yes Xus cov thwj tim. Peb paub zoo lawm tias Yes Xus yog Tswv Ntuj, nws yog tus cawm peb ntawm kev txhaum, nws yog peb kev cia siab, nws yog peb txoj kev ntseeg. Vim li ntawd, peb kuj paub zoo tias kev ua lub neej hauv txoj kev ntseeg txog Yes Xus muaj kev txom nyem muaj xwm txheej ntau yam tos peb, peb yuav tsum yeej kom tau. Yog muaj kev ntseeg, peb kuj yuav yeej tau. Yes Xus cov thwj tim yuav tsum muab yus lub siab los npuab Tswv Ntuj. Yus paub zoo tias txoj kev ua Yes Xus thwj tim tsis ua rau yus muaj nyiaj muaj txiag dua lwm tus, tsis ua rau yus muaj suab muaj npe nrov dua lwm tus, tsis ua rau yus muaj hwj chim dua lwm tus, tab sis, kev ua Yes Xus thwj tim yuav ua rau yus muaj kev zoo siab, kev thaj yeeb, muaj kev kaj siab lug. Nyob zoo sawv daws.