Hnub Chiv Tim 7 Lub 5 Hlis 2023 (Sunday Homily)

Hnub Chiv Tim 7 Lub 5 Hlis Ntuj 2023

Lub lis piam 5 hauv lub Caij Hla

Zam 14:1-12

“Kuv yog Txoj Kev, yog Qhov Tseeb, thiab yog Txoj Sia.”

Nyob zoo….

Kwv tij sawv daws, hauv Ntawv Moo Zoo hnub no peb hnov Huab Tais Yes Xus tshaj tawm rau sawv daws paub tias nws yog “Txoj Kev, yog Qhov Tseeb, thiab yog Txoj Sia.”

Huab Tais Yes Xus yog txoj kev txhais tias nws yog txoj kev mus txog Leej Txiv Tswv Ntuj. Nws cov lus qhia, nws cov lus yog Tswv Ntuj lo lus, Huab Tais Yes Xus tej txoj hauj lwm, qhov zoo ntau yam uas nws ua yog txoj kev coj peb mus txog Tswv Ntuj. Kom peb yuav tsum ua raws li nws. Huab Tais Yes Xus cov lus qhia coj peb mus kom peb lub yus lub neej nyob hauv Tswv Ntuj txoj kev, kom yus ua lub neej hauv txoj kev zoo, hauv txoj kev sis nyiam sis hnub, sib pab sib pawg. Peb yuav tsum ua raws li nws txoj kev.

Huab Tais Yes Xus yog qhov tseeb txhais tias Huab Tais Yes Xus cov lus qhia thiab nws cov hauj lwm yog qhov tseeb, nws tsis pws, tsis muaj lo lus dag. Nws yog Tswv Ntuj tiag tiag.

Huab Tais Yes Xus yog txoj sia txhais tias nyob hauv nws, nyob hauv Tswv Ntuj tsis muaj kev tuag. Tswv Ntuj pub txoj sia. Leej twg ntseeg txog Tswv Ntuj kuj yuav muaj txoj sia nyob mus li. Yes Xus hais: Nej tsis txhob ntxhov siab mog. Nej ntseeg txog Tswv Ntuj, nej ntseeg txog kuv thiab mog! Peb cov ntseeg sawv daws paub zoo txoj kev mus txog Tswv Ntuj lawm. Ib yam li Yes Xus hais rau cov thwj tim tias: Nej paub txoj kev mus txog qhov chaw kuv yuav mus.

Huab Tais Yes Yus sawv rov los ntawm kev tuag lawm. Nws mus cuag Leej Txiv ua ntej peb sawv daws. Tab sis mas Huab Tais Yes Xus cog lus tias “Nyob hauv kuv txiv tsev, muaj ntau chav. Thaum kuv mus npaj tau ib qho chaw rau nej lawm, kuv yuav rov los coj nej mus nyob ze kuv.” Huab Tais Yes tab tom tos peb mus nyob ze nws thiab Leej Txiv. Ua li ntawd, nyob hauv ntiaj teb no, peb yuav tsum taug kev hauv nws txoj kev thiab ua raws li nws tau qhia peb.

“Kuv yog Txoj Kev, yog Qhov Tseeb, thiab yog Txoj Sia.” Tsis muaj leej twg mus cuag Leej Txiv tau, yog nws tsis los ntawm kuv.