Hnub Chiv Tim 9 Lub 7 Hli 2023 (Sunday Homily)

Hnub Chiv Tim 9 Lub 7 Hlis Ntuj 2023
Lub cail Nyob Nruab Xyoo
Mas Tais 11:25-30

“Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus.”
Nyob zoo…
Kwv tij hmoob, hnub no Mas Tais Lub Moo Zoo piav tias Huab Tais Yes Xus cav txog Leej Txiv vim tias Leej Txiv zais tej yam ntawd rau cov neeg thoob tsib thiab cov neeg ntse. “Tej yam ntawd” uas Yes Xus hais txog yog dab tsi? Hauv zaj ua ntej piav tias “tej yam ntawd” yog cov hwj huam yees ntxwv uas Yes Xus tau ua rau cov neeg hauv nroog Npes Xais Das. Yes Xus ua hwj huam yees ntxwv rau sawv daws pom vim tias sawv daws yuav tig rov los yuav lub siab tshiab, tig rov los ntseeg Ntuj thiab cav txog Leej Txiv pem Ntuj lub Ceeb Tsheej. Tab sis mas cov neeg ntawd tsis ntseeg nws. Lawv tsis pom tias tej yam ntawd tuaj ntawm Tswv Ntuj tuaj. Cov neeg tsis ntseeg Yes Xus feem ntau yog cov neeg thoob tsib thiab cov neeg ntse, cov kawm ntawv siab siab, thiab cov neeg loj cov neej laus. Lawv tsis ntseeg yooj yim li cov me nyuam. Vim rau qhov hais tias lawv lub siab puv tas lawm, lawv txais qhov tshiab tsis tau lawm, lawv lub siab lub tswv yim txais lo lus qhia tshiab tsis tau lawm vim tias lawv ntseeg lawv tus kheej xwb. Yes Xus thiaj hais tias “Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus.” Yes Xus muab piv cov me nyuam rau cov neeg tsis muab hlob, cov neeg me, cov neeg muaj lub siab dav, cov neeg muaj lub siab zoo li cov me nyuam. Lawv lub siab lub tswv yim tsis puv, lawv zoo siab txais Tswv Ntuj lo lus, lawv zoo siab ntseeg Tswv Ntuj thiab pom tias Huab Tais Yes Xus ua hwj huam yees ntxwv hauv lawv lub neej, hauv lawv yim neeg. Niaj hnub, Huab Tais Yes Xus ua hwj huam yees ntxwv hauv lawv lub neej, lawv txais thiab ntseeg tias yog Tswv Ntuj tus ua tej yam ntawd hauv lawv lub neej. 
Yes Xus hais rau cov qhib lub siab lub tswv yim txais Tswv Ntuj rau hauv lawv lub neej tias “Tas nej sawv daws uas nej khwv, thiab ris nra hnyav, nej tuaj cuag kuv mog! Kuv yuav cia nej so los siav.” “Nej txais kuv tus quab. Nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav. Vim kuv tus quab kwv yooj yim, thiab kuv lub nra sib.” Kuv nyiam lub Moo Zoo zaj no kawg, vim tias kuv pom tias Tswv Ntuj hlub neeg kawg, Tswv Ntuj tsis tso nws cov me nyuam pov tseg. Yog peb khwv khwv vim tias peb lub nra hnyav kawg, hnub no, Yes Xus caw peb tuaj nrhiav nws, tuaj cuag nws, nws yuav cia peb so los siav thaum peb muaj zog tuaj lawm, peb mam rov qab mus ua hauj lwm, ua lub neej ib zaug dua. 
Kwv tij sawv daws, thov peb cia siab rau Tswv Ntuj, thov peb qhib lub siab lub tswv yim txais Tswv Ntuj, thov peb ua neej zoo li me yuam yau ua siab zoo txais Tswv Ntuj hauv peb lub neej. Thov Tswv Ntuj ua peb sawv daws kaj siab lug mog!