Lo lus ntawm lub neej hauv lub 8 hlis

Lo lus hauv lub neej (Word of Life : Light has always symbolized life)

Ib txwm los qhov pom kev yog lub cim pom kev hauv lub neej. Txhua hnub peb tos ntshis qhov pom kev nyob hauv kev pib dua tshiab. Lub ntsiab ntawm qhov pom kev kheev kheev tshwm nyob hauv neeg lub keeb thiab cov kev cai txheej thaud. 
Nyob hauv His Xas Lais liv xwm yog kev tsuj xeeb Has Nus Kas, yog lub caij ntawm qhov pom kev ci ntsa. Yog kev nco txog kev cev lub tuam tsev teev Ntuj nyob Yes Lus Xas Les tshiab thiab kev daws tso ntawm cov kev teev hawm uas tiv kev ntseeg. 
Cov Mawv Xis Lim qee leej taws tswm ciab rau lawv tus yaj saub lub hnub yug uas hu ua Mawlid hauv xeem lus Arabic los yog Mevlid Kandili hauv xeem lus Tws Kis. Diwali yog lub caij pom kev ntawm cov His Ntus. Lawv kuj muaj kev tsuj xeeb lwm txoj kev teev hawm nyob Is Ntias thiab. Yog lub cim ntawm qhov zoo yeej qhov phem. Ntawm cov neeg ntseeg, mas Yes Xus yog qhov pom kev uas kaj lub ntiaj teb. Qhov pom kev thiaj raug teeb tsa ua qhov ruaj khov, thiab qhia kom pom tias yog Tswv Ntuj qhov chaw nyob, yog qhov paj tshab pub rau tas ib zeej tsoom neeg thiab lub ntiaj teb.
Nej txhua tus yog me nyuam ntawm qhov pom kev thiab yog me nyuam hauv txhua tiam neeg. Peb tsis yog hmo ntuj tug los yog qhov tsaus ntuj tug, tab sis cov me nyuam zim txwv no tus yam ntxwv yog zoo li cas ? Kev tso tseg txoj kev tub nkeeg thiab kev tsis quav ntsej, yog nyob hauv txoj kev txiav txim siab uas ceeb ras txog xaiv kev nyiam kev hlub thiab kev ua lub neej hauv lub sij hawm kom puv npo. 
Nyob hauv tsab ntawv no, cov thwj tim cov lus mus txog cov ntseeg nyob Tes Xas Los Nis. Qhov ntawd yog cia peb saib ua ke thiab txhob ua xyem xyav, kev tsis quav ntsej txhua yam nyob hauv lub caij tib neeg xav tau qhov pom kev, zoo li Paj Lug sau nyob hauv tsab ntawv 1Tes Xas Los Nis zaj 5 qib 8. 
Tas cov uas tsis nyob hauv hmo ntuj, lawv muaj cai ua kom qhov tseeb tawm tuaj. Kev sib raug zoo ntawm txhua tus tib neeg, yog ua kom tus kheej cov hauj lwm mus xwm yeem los ntawm kev ntseeg, kev nyiam kev hlub thiab kev cia siab. Ua kom pom tias yog tus sawv rov los lub chaw nyob. Dhau nov lawm, peb tsim nyog yuav cog kev phooj ywg kom sib ze thiab tseeb tiag nrog Tswv Ntuj. Tshawb nrhiav peb lub siab kom ntxaws thiab tshawb nrhiav lub sij hawm hauv kev sib tham thiab kev thov Ntuj, los kev ua lub neej raws Tswv Ntuj cov lus. Ua kom qhov pom kev nyob hauv peb tawm los. Peb sawv daws yog me nyuam ntawm qhov pom kev thiab yog me nyuam hauv txhua tiam neeg, peb tsis yog hmo ntuj tug thiab qhov tsaus ntuj tug. 
Qee zaus peb swm nrog kev ua lub neej nyob hauv qhov tsaus ntuj hauv peb lub siab, peb txaus siab rau qhov pom kev cuav nyob ncig peb, thiab txhua yam lus cog sov siab hauv lub ntiaj teb. Txawm li cas kuj xij, Tswv Ntuj kheev kheev hu peb kom ua qhov pom kev tsom rau sab hauv thiab rau tib neeg, saib txhua yam uas tshwm sim kom meej tseeb. Kom peb tau paub txog lub cim ntawm kev nyob kaj siab, peb yuav tau ua siab ntev tas mus li nyob hauv peb txoj kev xaiv pib dua tshiab ntawm qhov tsaus ntuj mus rau qhov pom kev. Chiara Lubich sau tias : 
“Cov neeg ntseeg yuav khiav tsis dhau lub ntiaj teb no, thiab zais los yog hais tias kev ntseeg yog yus ntiag tug. Tsis hais nws los yog koj nyob hauv lub ntiaj teb no, txhua tus nyias muaj nyias hauj lwm uas yog qhov pom kev, koj kuj muaj cai ua cov hauj lwm no ib yam nkaus. Yog koj tsis ua, qhov tsis ua ntawd kuj zoo ib yam li cov ntsev uas tsuag tsis muaj qhov qab, los yog qhov pom kev zoo li tus duab xwb.”
Li ntawd, cov neeg ntseeg txoj hauj lwm yog ua kom qhov pom kev no ci ntsa rau lwm tus, thiab ua lub cim hais txog Tswv Ntuj nrog txhua tus neeg nyob. Peb txhua tus yog qhov pom kev li me nyuam thiab yog me nyuam hauv hnub no. Peb tsis tau yog hmo ntuj tug los yog qhov tsaus ntuj tug. Tswv Ntuj yog qhov pom kev thiab tus muab siab  rau nrhiav Tswv Ntuj nws yuav tau ntsib. 
Tsis hais dab tsi yuav tshwm sim, peb yuav tsis ncaim ntawm nws txoj kev nyiam kev hlub, vim peb yog nws me tub me nyuam. Yog tias peb siab ruaj nreb rau tej lus no, peb yuav tsis pom tias txawv los yog tu siab rau yam uas ntxhov quav niab.   
Xyoo no av qeeg nyob Tws Kis thiab Xis Lias teb, ua rau neeg tuag tshaj 50,000 leej thiab ua rau ntau plhom tus neeg lub neej pauv ntxeev. Cov neeg dim siav ciaj los ntawm av qeeg pom tias : tsoom pej xeem nyob ntawd thiab nyob lwm teb chaws, yog qhov pom kev uas yuav xa kev pab tam sim ntawd thiab yog tus nplij cov neeg uas tus neeg lawv hlub ncaim mus lawm. Vaj tse txhua tsav puas yam, qhov tsaus ntuj tsis tuaj yeem npog tau cov neeg uas lawv xaiv ua lub neej hauv qhov pom kev thiab tsim qhov pom kev, yog hais txog cov neeg ntseeg. Nov yog hais txog lub neej uas muaj Yes Xus nrog peb nyob. Yes Xus nrog peb nyob, ua rau peb tuaj yeem ntsia pom lub neej maj mam sawv thiab muaj kev cia siab. Pab kom peb ua lub neej ntxiv mus nyob hauv Tswv Ntuj txoj kev nyiam kev hlub.