NTAWV NTSHIAB HAUV HNUB TIM 1 LUB 7 HLIS 2021

HNUB RAU, LIS PIAM 13 CAIJ NRUAB XYOOS (XYOO TAB)

PHAU NTAWV HAUV PAUS (HP22:1-19)

Thaum tej xwm no dhau tas lawm, Tswv Ntuj sim Has Nplas Has siab. Nws hu tias "Has Nplas Has ! Has Nplas Has!"

Has Nplas Has teb tias "Kuv nyob ntawm no!"

Tswv Ntuj hais tias "Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj."

Tag kis, Has Nplas Has sawv ntxov, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus rau thaj chaw uas Tswv Ntuj qhia rau nws.

Hnub peb, Has Nplas Has tsa muag ntsia pom thaj chaw ntawd tseem nyob deb. Has Nplas Has hais rau nws ob tug tub txib tias "Neb nrog tus luj nyob ntawm no. Kuv tus me nyuam wb mus kom txog tid, wb yuav hawm Ntuj, wb mam rov los ntawm neb."

Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus.

His Xas Has nug nws txiv Has Nplas Has tias "Kuv txiv!"

Has Nplas Has teb tias "Me tub, koj hais dab tsi!"

His Xas Has hais ntxiv tias "Ua cas pom hluav taws thiab cov taws xwb, ua li tus yaj yuav coj los hlawv txi Ntuj nyob qhov twg?"

Has Nplas Has teb tias "Me tub, Tswv Ntuj mam li muab tus yaj uas yuav txi Ntuj rau wb."

Ces nkawd ob leeg taug kev mus ntxiv. Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum cov taws saum lub thaj txi Ntuj.

Has Nplas Has tsa tes mus nthos rab riam yuav coj los tua nws tus tub. Tiam sis HUAB TAIS tus Tshiab hu saum ntuj tuaj rau nws tias "Has Nplas Has! Has Nplas Has!"

Has Nplas Has teb tias "Kuv nyob ntawm no!"

Tus Tshiab hais tias "Txhob tsa koj txhais tes rau saum tus me nyuad! Txhob ua dab tsi phem rau nws! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv."

Has Nplas Has tsa muag ntsia pom ib tug laug tshis uas ob tug kub daig hauv ib koog pos. Ces nws mus muab tus laug tshis los hlawv txi Ntuj hloov nws tus tub chaw.

Has Nplas Has tis npe rau thaj chaw ntawd hu ua ‘HUAB TAIS yuav pub.’ Ces zaum no thiaj muaj lo lus hais kam tias ‘Saum lub roob HUAB TAIS yuav pub.’

HUAB TAIS tus Tshiab rov hu zaum ob saum ntuj tuaj rau Has Nplas Has, nws hais tias "HUAB TAIS hais tias kuv tuav txog kuv lub npe cog lus rau koj tias vim koj tau ua li ntawd, koj tsis yig, koj tuaj yeem muab koj leej tub twm zeem los txi rau kuv, mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog.

Tas txhua haiv neeg nyob ntiaj teb yuav tuav txog koj tsoom xeeb ntxwv lub npe los sib foom hmoov zoo, vim koj tau mloog kuv lus."

Has Nplas Has rov qab los cuag nws ob tug tub txib, ces lawv sawv kev rov los rau Npes Xas Npes. Has Nplas Has nyob Npes Xas Npes.

MAS TAIS NTAWV MOO ZOO (MT9:1-8)

Yes Xus nce mus hauv nkoj, nws hla dej rov los txog nws lub nroog. Thaum ntawd, luag nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg, nws hais rau tus tuag ceg tias "Me tub, koj tso siab mog! Koj cov txhaum daws tas lawm."

Thaum ntawd, muaj ob peb tug Kws Ntawv Ntshiab xav twj ywm hauv nruab siab tias ‘Tus neeg ntawd thuam Ntuj.’ Tab sis Yes Xus paub qhov lawv xav, nws hais tias "Vim li cas nej xav tej yam phem rau nruab siab?

Lo lus twg hais yooj yim dua, puas yog lo tias 'Koj cov txhaum daws tas lawm,' los yog lo tias 'koj sawv mus kev?'

Nej yuav paub tias Neeg Leej Tub muaj lub hwj huam daws txhaum tau nyob ntiaj teb no."

Yes Xus hais ntxiv rau tus tuag ceg tias "Nqa koj lub txaj, koj rov mus tsev."

Ces tus tuag ceg sawv, thiab nws rov mus tsev. Tsoom sid pom li ntawd, sawv daws ntshai. Lawv cav txog Tswv Ntuj vim nws pub lub hwj huam loj npaum li no rau neeg.