NTAWV NTSHIAB HAUV HNUB TIM 10 LUB 5 HLIS 2021

NTAWV HAUJ LWM (HL16:11-15)
Paj Lug hais tias ”Peb caij nkoj nyob Thuas ncaj qha mus rau Xas Mos Thas Kes. Hnub tom qab peb mus rau Nias Pos Lis. 
Txog Nias Pos Lis, peb mus ntxiv rau Fis Lis Pos uas yog thawj lub tsheej nyob hauv lub ceeb Mas Xes Dos Nias, uas yog ib lub xeev Los Mas. Peb nyob ob peb hnub hauv lub nroog ntawd. 
Txog hnub xav npas tos, peb tawm mus rau sab loog nraud, nyob ntawm ib tug ntug dej, uas peb paub tias yog qhov chaw teev ntuj. Peb zaum, ces peb thiaj hais lus rau cov poj niam tuaj sib sau nyob ntawd. 
Muaj ib tug poj niam hu ua Lis Dias, nws mloog peb hais. Nws yog ib tug muag tshuaj zas ntaub liab tsam xem nyob hauv lub tsheej Thias Tis Las. Nws teev Tswv Ntuj. Huab Tais qhib nws lub siab kom nws txais Paj Lug cov lus. 
Thaum Lis Dias thiab nws tsev neeg txais lub cim ntxuav tas, mas nws thov peb li no ‘Yog nej saib kuv yog ib tug neeg ntseeg txog Huab Tais, mas thov nej chaws los nyob hauv kuv tsev.’ Ces nws kom peb mus so hauv nws tsev.

ZAM NTAWV MOO ZOO (Z15:26-16:4a)
Yes Xus hais tias ”Leej Nplij Neeg yuav tuaj. Nws yog tus uas kuv yuav xa ntawm Leej Txiv tuaj rau nej. Nws yog Leej Ntuj Plig qhia qhov tseeb uas tawm hauv Leej Txiv los, nws yuav ua tim khawv txog kuv. Nej kuj ua tim khawv thiab, vim nej nrog kuv txij lub hauv paus los.
Kuv hais tej no rau nej kom nej txhob dawm ko taw. Luag yuav ntiab nej tawm hauv cov tsev txoos. Luag haj tseem yuav ua phem tshaj, vim txog lub sij hawm uas tus muab nej tua, nws yuav xav tias nws ua ib qho los hawm Tswv Ntuj. 
Lawv yuav ua li ntawd vim lawv tsis paub Leej Txiv thiab tsis paub kuv. Kuv hais tej no rau nej, kom thaum txog lub sij hawm ntawd, nej nco ntsoov tias kuv twb xub qhia nej lawm.”